مواضيع قابلة للنقاش

[محمد العزام]

يعني المكتوب مبين من عنوانه



كل شخص لما يدخل المنتدى بكون عايش يومه اللي بكون بالجامعة والا بكون بمكان عمله ولاحظ شي بهالفترة وما عجبته او العكس مثلا صارت قضية قدامه صار موقف ويحب يناقشه ويشوف ابعاده يقدمه لالنا من خلال هالموضوع والكل يتناقش فيه ونطلع براي واحد باذن الله ونطبق من خلال مشاركاتنا مبدا الراي والراي الاخر والكل رح يستفيد




اول شخص بيدخل على هالموضوع وعجبته الفكر يقدملنا موضوع للنقاش كيف ماكان الموضوع سياسي اجتماعي اقتصادي ......

[أمجاد الشموخ]

محمد
بشكرك على هذا الموضوع الي من خلاله نناقش عدة
أمور أن كانت سلبية أو إيجابية وكم يروق لي مثل هذه المواضيع
التي تمني الفكر وتعطينا حلاً لواقعنا الذي نعيشه
أتمنى أن تختار لنا موضوع أنت ونحاول أن نناقشه بكل ود ومحبة
تحياتي لجهودك المبذولة مودتي

[دموع الغصون]

فكرة رائعة جداً وسأكون من المتابعين دوماً
راقت لي كثيراً
يلا محمد بننتظر أول موضوع منك

[مادلين]

انا حاب بلش بأول موضوع


مضاهرات الحزب الاسلامي

[shams spring]

فكـــرة حلوة كتير ~~ محمد العزام ~~

وبصراحة احنا الشباب محتاجين لهيك مواضيع لانها فرصتنا بانو نعبر عن ارائنا بشكل سليم

مشكور على هالفكرة .... وان شاء الله رح نشارك فيها


مادلـــين ...فكرتك مش واضحة؟؟
مظاهرات الحزب الاسلامي من اي جانب بالزبط ؟؟؟

اطرحي فكرتـــك بشكل اوضح مشان الكل يفهم عليكي ويشارك

ننتظر ردك

[محمد العزام]

ان شاء الله نقدر كلنا نقدم افكارنا بشكل ايجابي ونتعلم كيف يكون النقاش بمواضيع يمكن البعض يعتبرها حساسة بمجتمعنا والبعض يعتبرها نقص احنا بحاجة لنكمله كمان بواقعنا



مابقدر اتعدى على اول شخص طرح الموضوع وهي مادلين يعني ننتظر ردها لحتى توضح اكثر فكرتها

بس بحكي هي بتقصد عن جبهة العمل الاسلامي والمضاهرات اللي بتدعي لالها وغيرها كثير من الحركات اللي كانت تدعو للاعتصامات والمظاهرات خاصة بوقت ماسمي الربيع العربي كانها هالحركات كانت تنتظر مثل هيك مواقف ومثل هيك انهيار دول لحتى تقترب اكثر من الشعوب وبالتالي تخ\حريضها للثورات واسقاط النظام وسحب الصلاحيات من رئيس الدولة وهاد شي يمكن البعض انجر لالو بعواطفه مش اكثر هالحركات قدرت تجر هالبعض من خلال اعلامهم بواقع المعيشة للمواطن والفقر والبطالة ........الخ البعض بسمي هالحركات نابعة من ضمير انساني لانها تهتم بمصلحة المواطن اللي الكثير اعتبرها كانت مختفية ظاهرة الاهتمام بالمواطن والبعض اعتر هالحركات مجرد بلاء صار بالدولة يمكن اتشعبت الكثير بالموضوع بس برجع للحركات الاسلامية اكيد فكرتها غلط وبفترة انا اشتركت بحزب الجبهة الاسلامي ووجدت او مناصب مش اكثر متشددين بامور مابصير فيها التشدد سواء بالدين او بغير الدين والدين يسر وليس عسر ووجدت انو اهدافهم الرئيسية الاستئيلاء على منصة العرش مش اكثر وقاموا بمظاهرات اكثرها تخريبية حتى بقانون المظاهرات مابصير التكسير ولا التخريب المظاهرة يجب ان تكون سلمية مش تخريب او تكسير




بتمنى نشوف ارائكم

[دموع الغصون]

أنا مارح علق على الموضوع كتير لأنه بتصور رأي محمد كان شامل لكن أنا شخصياً ضد اطلاق مسمى اسلامي على هيك حركات هدفها الرئيسي السلطة و المصالح ولو شوي ننظر للأمور نظرة واقعيه رح نستفيد كتير من ثورة مصر و موقف الحزب هناك

مشكورة مادلين على طرح القضية

[مادلين]

انا بقصد المضاهرات الي حصلت قبل 3 اشهر تقريبا في عمان وبعض المدن التانية بقصد الاصلاح

[دموع الغصون]

مظاهرت و بقصد الأصلاح بتصور الكلام متناقض عمر المظاهرات ما عملت اصلاح
هلا بنظري الموضوع تشبك كتير و اله اكتر من زاويه لهيك المظاهرات الي كانت من الحركات بغض النضر شو مسماها باخر فتره كانت مجرد مظاهر لمصالح شخصية وليست مصلحة وطن

أشكركِ مادلين على القضية الجميلة

[مادلين]

وانا احكي مافي داعي لائي مضاهرة في الاردن لانو جلالة الملك مو مقصر مع شعبو بش والي مش عاجبيتو
هلبلد يطلع منها

[shams spring]

وانا احكي مافي داعي لائي مضاهرة في الاردن لانو جلالة الملك مو مقصر مع شعبو بش والي مش عاجبيتو
هلبلد يطلع منها


هلا بالنسبة للمظاهرات بشكل عام يا مادلين : هي عبارة عن تعبير فئة معينة عن ارائها ومعتقداتها ومبادئها بالحياة

وانا شخصيا مع انه جميع الفئات يعبرو عن ارائهم بشكل سلمي ... لانه الانسان لازم يكون عندو مبدأ عايشلو .. وعندو هدف ليحققو

لكن بدون ما نأذي الوطن ... فهي شي مهم .. وما بنقدر نستغني عنه ....

اما شغلة انه الي مش عاجبة الوطن يطلع منه ... كمان المواطن من حقة ابداء رأيه بهالوطن ويحاول اصلاحه قدر الامكان
الصمت ما بفيد .. لانه رح يكون نكرة بهالحياة ....
وانه يطلع من الوطن ... برأي هاد مش حل لازم نتقبل الرأي والرأي الاخر

المظاهرات موجودة بكل مكان وهي ما بتعكس مضمون الشر وتخريب البلد متل ما بفكر كتير من الناس
كـــل مظاهرة وحسب الفئة الي مسؤولة عنها وحسب مبادئها

[shams spring]

هلا بالنسبة لمظاهرات الجبهة الاسلامية ... انا بتعجبني مبادئهم ... وشيء طبيعي حزب بالقوة هاي انه يعبر عن مبادئو وارائو على شكل مظاهرات .... ولا كيف رح ينسمع صوتهم...!!!!!!!

لكن برجع وبكرر بشكل سلمي ... وفعلا اغلب المظاهرات الي بتكون مسؤولة عنها الجبهة بتكون سلمية

الوطن .. غالي علينا ... لكن مش بالصمت ... ولا بمسح الجوخ....
لما يكون عند الانسان مبدأ ... ما رح يظل يهز براسو اه اه ع كل شي بصير ... في شيء غلط وفي شي صح ...

بالنسبة لشغلة المناصب الي طرق الها ~~ محمد العزام ~~ اتوقع هاي الشغلة متواجدة بأي مكان دائما هنالك افراد هدفهم الاول والوحيد المناصب واكيد هاد رح يأثر عليهم ... لكن انت لا تاخد على الافراد احنا بنحكي عن جبهة ... على مبادئهم ... على خلفيتهم ... مرجعهم (الاسلام) ...

كلمة ~~ الربيع العربي ~~ ان بكرها وبموت منها
حتى ما بحب ادخلها بقاموس نقاشاتي, لكن شغلة المظاهرات كان هدفها استغلال الربيع العربي في الدول المجاورة , انا برأي مش صح

لو اطلعت على شعارات الجبهة على ما اذكر كلها تحمل صيغة اصلاح حكومي , وعمرهم ما تجاوزو هاد الخط

احنا الشعب الاردني بشكل عام بنحب القيادة الهاشمة وما حد بختلف عليها ... واحنا وضعنا مش زي الدول المجاورة
لانه علاقتنا بالقيادة الهاشمية يسودها الحب والمودة النابع من القلب
والحمد لله على هالشي

تجربتك يمكن اعطتك فكرة معينة ... بظروف معينة ..واسباب معين
لكن ما بتقدر تعمم يا محمد

تقبل مروري
^_^

[محمد العزام]

هلا بالنسبة للي حكته الاخت مادلين هو راي عبرت عنه ويمكن ببعض الاحيان يكون مستفز بس الراي والراي الاخر لازم يطبق على مبادئنا وحواراتنا واحنا مابنتكلم عن جلالة الملك شخصيا ونحكي انو مقصر بحق شعبه كمان في النا اراء بهالموضوع بس اللي تحت قيادة جلالة الملك انتشر الفساد وانتشرت غياب القانون والعدالة ومن هون بلشت الحركات تظهر اول باول وجدت لنفسها متسع من الزمان والمكان لحتى يحكوا مطالبهم ويعبروا عن ارائهم بس للاسف اكثرها اخذ منحنى التكسير والتخريب بالاموال العامة وهالشي ماحد بيرضاه ولا بيتقبله

بدك تطالب باصلاح طالب بشكل ودي مش بالعصا دايما الاردن كانت بلد ضيافة لجميع الشعوب واقل مافيها احترم هالضيافة ولاتخلي نفسك ناكر للجميل هاد بالنسبة لردي على الاخت شمس انا كنت معجب باراء وقيادات جبهة العمل الاسلامي وحبيت اشاركت فيو من منطلق هالمبادئ اللي كانوا يتمسكوا فيها ومرجعهم الدين زي ماحكيتي بس بحب اوضحلك نقطة اخر شي كانوا يفكروا فيو الدين
يمكن مابقدر احكي شو هالمطالب وشو اللي اتعلمته من تجربتي معاهم بس كانت لشغلة وحدة قلب مناصب الحكم من اصغر شخص لاكبر شخص من خلال الاستئيلاء على مناصب حساسة بالاردن وبعدها الاستئلاء على كامل الحكم واللي بيتخذ هالشي وراء حجة الاسلام فالاسلام بريء منه
وصراحة عيب علي احكيها الاردن لايحكمها الا الهاشميون من اصل اردني واي اردني لايقبل غير ذلك لانريد من تقبلنا ضيافتهم بان يحكمونا

اهل مكة ادرى بشعابها ولطالما كان الاردن بالفعل اهل للضيافة ولكن ماذا فعلوا بنا ................ بدها جواب والجواب واضح من خلال مايحصل

[محمد العزام]

هلا في شي بنسميه مايحدث خلف الستار السياسي ........... مابنقدر نحكم على شي من خلال المبادئ اللي بتنطرح انا مستعد اقترح الف مبدا واخلي الناس يقتنعوا فيه بس شو الهدف من المبادئ اكيد صاحب هالمبادئ لو بكون الو اهداف رئاسية مارح يقدر يحطها كهدف اساسي او يقدر يبين هالهدف اول شي بجذب قلوب الناس لالي وبحاول اكسب رضاهم وودهم واجرهم خلف مبادئي اول باول لحتى احقق هدفي الاسمى

الاصلاح شي مطلوب وانا من اكثر الناس اللي بتطالب باصلاح في فساد في محسوبيات في واسطات وفي سرقات بس ليش ما طالبت فيهم من اول من قبل الربيع العربي سواء الجبهة الاسلامي او غيره ليش لما صار هالربيع حاولت وبشده انك تطالب فيه الاردن على كف عفريت والمخفي اعظم مش مجرد كلمة انتمي معناها انو بالفعل انتمي في قول وفعل ...........

[محمد العزام]

نفس الشي في حد حاب يعلق والا نسكر الموضوع
ونفتح موضوع جديد

[دموع الغصون]

ببنتظر القضية الجديدة بكل شوق

يلا وينها ؟؟؟

[محمد العزام]

طيب اقترحي موضوع دموع وبناقش فيه

شو رايك وبدون مقابل :SnipeR (3):

[دموع الغصون]

اوك بتمنى هالقضيه تعجبكو يعني هاد يلي طلع معي هلا

...

قضيتنا اليوم رح تكون متفرعة لفرعين

الفرع الأول هجرة العقول العربية بشكل عام و الأردنية بشكل خاص سواء كانت هالهجرة خارج الأردن أو خارج الوطن العربي
هل هي هجرة أم تهجير و شتان بين هذه وذاك

الفرع الثاني : يومياً نسمع بأن مخترع أردني انجز كذا وتوصل الغرب إلى س من التطور في علم ص بعقول عربية أو من أصل عربي ؟ لماذا لا يتم استثمار هذه العقول في وطننا العربي ؟؟

...

[shams spring]

هلا بالنسبة للي حكته الاخت مادلين هو راي عبرت عنه ويمكن ببعض الاحيان يكون مستفز بس الراي والراي الاخر لازم يطبق على مبادئنا وحواراتنا واحنا مابنتكلم عن جلالة الملك شخصيا ونحكي انو مقصر بحق شعبه كمان في النا اراء بهالموضوع بس اللي تحت قيادة جلالة الملك انتشر الفساد وانتشرت غياب القانون والعدالة ومن هون بلشت الحركات تظهر اول باول وجدت لنفسها متسع من الزمان والمكان لحتى يحكوا مطالبهم ويعبروا عن ارائهم بس للاسف اكثرها اخذ منحنى التكسير والتخريب بالاموال العامة وهالشي ماحد بيرضاه ولا بيتقبله

بدك تطالب باصلاح طالب بشكل ودي مش بالعصا دايما الاردن كانت بلد ضيافة لجميع الشعوب واقل مافيها احترم هالضيافة ولاتخلي نفسك ناكر للجميل هاد بالنسبة لردي على الاخت شمس انا كنت معجب باراء وقيادات جبهة العمل الاسلامي وحبيت اشاركت فيو من منطلق هالمبادئ اللي كانوا يتمسكوا فيها ومرجعهم الدين زي ماحكيتي بس بحب اوضحلك نقطة اخر شي كانوا يفكروا فيو الدين
يمكن مابقدر احكي شو هالمطالب وشو اللي اتعلمته من تجربتي معاهم بس كانت لشغلة وحدة قلب مناصب الحكم من اصغر شخص لاكبر شخص من خلال الاستئيلاء على مناصب حساسة بالاردن وبعدها الاستئلاء على كامل الحكم واللي بيتخذ هالشي وراء حجة الاسلام فالاسلام بريء منه
وصراحة عيب علي احكيها الاردن لايحكمها الا الهاشميون من اصل اردني واي اردني لايقبل غير ذلك لانريد من تقبلنا ضيافتهم بان يحكمونا

اهل مكة ادرى بشعابها ولطالما كان الاردن بالفعل اهل للضيافة ولكن ماذا فعلوا بنا ................ بدها جواب والجواب واضح من خلال مايحصل

اول شي انا بتأسف على الرد المتأخر بحكم انه الموضوع تسكر .. لكن ما صحتلي الفرصة المناسبة بتمنى تتقبلو مروري

بالنسبة لتجربتك مع الهيئة محمد ... اكيد التجربة والدخول بهالقالب السياسي هو مش متل الفرجة من بعيد
يمكن انت شفت اشياء نحنا ما بنعرفها وهاد يلي خلاك تغير موقفك منهم ...
لكن انا بالنسبة الي ما شفت اي شي زعجني منهم او خلاني احسهم انهم شغل مناصب والهم اهداف خفية غير الظاهرة للشعوب ... صح انا ما الي تجربة معهم لكني من الناس الي متابعة الهم بنقدر نحكي بشكل مستمر ... وبتهمني اخبارهم ... وملاحظة انه في حملة تشويه عليهم مش طبيعية ... خصوصا بين الشباب ...

ومع هاد وكلــه شعاري الاول والاخير دائما وابدا الاردن خط احمر .. ولو في يوم اكتشفت انه فعلا هالهيئة الها مطامع سياسية تحت الطاولة ... وانها بتهدد الاردن ... انا اول وحدة رح اصف ضدها .

تقبل مروري ^_^ وبرجع بتأسف عالتأخير

[shams spring]

اوك بتمنى هالقضيه تعجبكو يعني هاد يلي طلع معي هلا

...

قضيتنا اليوم رح تكون متفرعة لفرعين

الفرع الأول هجرة العقول العربية بشكل عام و الأردنية بشكل خاص سواء كانت هالهجرة خارج الأردن أو خارج الوطن العربي
هل هي هجرة أم تهجير و شتان بين هذه وذاك

الفرع الثاني : يومياً نسمع بأن مخترع أردني انجز كذا وتوصل الغرب إلى س من التطور في علم ص بعقول عربية أو من أصل عربي ؟ لماذا لا يتم استثمار هذه العقول في وطننا العربي ؟؟

...




شكرا لك ~~ دموع الغصون ~~ على طرح هذه القضية التي تعتبر من اكبر المشكلات التي تواجهنا منذ زمن ولازات حتى الان موجودة وبقوة .... :eh_s(7):

بالنسبة للفرع الاول ... فأنا برأي هي تهجـــيــر بكل ما تحملة الكلمة من معنـــى ....
وكثرت الاسباب والنتيجة واحدة .... من قلة الحوافز ... والمؤهلات ... الوضع الاقتصادي في الاردن ... وقلة الفرص لاظهار المواهب والابداعات .... ابتداءا من المدرسة ... الى اعلى الدرجات العلمية ... واكيد الاسباب صعب احصرها ..للاسف

بكل بساطة لانه هاي العقول لما بتكون عنا في البلاد العربية بتكون في العتمة ... يعني ما حد داري عنها ... مواهب ضايعة ...ما في شي محفز لحتى تطلع اصلا ... ولو طلعت صعب تلاقي شي مؤسسة او افراد يتبنوها ماديا ومعنويا وحطي خطين تحت معنويا. يعني باختصار ما في شي بشجع الابداع والتميز ... حتى الافراد يلي عندهم قوة ارادة بكون الداعم الاول لهل إرادة هو السفر الى الخارج ... :bl (19):



كمان حتى لو استثمرت هاي العقول في وطننا العربي ... ما رح نقارن المردود الها كما في الخارج
مثلا : الشب بطلع من البلد ... 5 سنين بالكتير بكون مجمع حق بيت بالاردن

هون لو ضل 20 سنة ما بشتري بيت ...!!! :SnipeR (3):

اكيد ما بدي اخلي كل نظرتي سلبية .... في افراد بجتهدو شخصيا ... وعندهم اصرار في اظهار ابداعهم .. وفي الاخر بينجهو .. وهاد موجود لكن برجع وبكرر ~~ اجتهاد شخصي ~~ يعني ما في مؤسسات كتير عم تدعم جميع المواهب والابداعات في الاردن ....!!!

للاسف هاد الواقع ... الي انا شايفيته ...:44ebcbb04a:

تقبلي مروري ^_^

[shams spring]

يعني المكتوب مبين من عنوانه



كل شخص لما يدخل المنتدى بكون عايش يومه اللي بكون بالجامعة والا بكون بمكان عمله ولاحظ شي بهالفترة وما عجبته او العكس مثلا صارت قضية قدامه صار موقف ويحب يناقشه ويشوف ابعاده يقدمه لالنا من خلال هالموضوع والكل يتناقش فيه ونطلع براي واحد باذن الله ونطبق من خلال مشاركاتنا مبدا الراي والراي الاخر والكل رح يستفيد




اول شخص بيدخل على هالموضوع وعجبته الفكر يقدملنا موضوع للنقاش كيف ماكان الموضوع سياسي اجتماعي اقتصادي ......


فكرة رائعة ~~ محمد العزام ~~ ابدعت في فتح هذه النافذة للدخول على اهم الموضيع التي تحتاج الى نقاش واسع بين الشباب ... اتمنى تفاعل جميع الاعضاء في هذه الزاوية ..... لك ودي واحترامي



يثبت الموضوع

[دموع الغصون]

انا معك 100% للأسف ما في متابعة للمواهب و لا للمهارات و الإبداعات الشخصية بأي مرحلة من المراحل

و رأيك أنا متأكده أغلب الشباب متفقين معك فيه
لكن ليه لليوم مافي ولا مؤسسة و لا جهة حكومية أو خاصة بتدعم هيك عقول
ليه مغيبين الموضوع هاد عن الساحة كنو آخر همه عقول الشباب
شاطرين كل فتره يجيبو دعم للمؤسسات المجتمع المدني ضمن نطاق معين وممنوع تنصرف على البحث العلمي أو التنمية الذاتية للعقول
يعني كل فتره بنسمع عن اختراعات جديدة باسماء أردنية و الغرب وصللهم قبلنا و فجأه بختفو وين بروحو

بشكرك شمس على التعليق المميز و الفكر النير

[ملكه الاحساس]

فكرة رائعة جداً بصراحه انا بحب الناقش في صميم الامور


وتواضيح وجهه نظري


يسلمو محمد ع الموضوع الحيوي

[محمد العزام]

...

قضيتنا اليوم رح تكون متفرعة لفرعين

قضية كثثير مزعجة بالنسبة للهجرة والتهجير وكثير مؤلمة وبشكرك على طرحها دموع وبتمنى الكل يشارك فيها



الفرع الأول هجرة العقول العربية بشكل عام و الأردنية بشكل خاص سواء كانت هالهجرة خارج الأردن أو خارج الوطن العربي
هل هي هجرة أم تهجير و شتان بين هذه وذاك
بالبداية نبلش بمفهوم الهجرة للاردنيين خارج وطنهم .... يمكن السبب الرئيسي هو السبب المادي اللي الكل بيبحث عنه والكل بنادي فيه ومبين من مطالب هالشعب تحسين الاوضاع الاقتصادية وتحسين الضروف المعيشية وما الى ذلك .... وبكون حق مشروع لكل انسان بحاول يبحث عن كيانه خارج وطنه الكيان المادي بس يكون لفترة معينة مش لطول الحياة وبالاخر يرجع هالانسان لبلده بالكفن ويحكي اللي من وراه كان مخلص لبلده .... اانا كثير لاحظت ناس واتعرفت على ناس مغتربين والحمد لله رزقوا بنعيم الدنيا ومع هيك مش مستعد يفتح استثمار ببلده ويحس بنفس الشعب اللي هو كان اساس منهم ..... في اسباب ثانية للهجرة والتهجير ... الحرية .... الشخص عند مايلاقي حرية ببلده بتعبيره وارائه وافكاره بدخل بمرحلة انو خلص هالوطن ماعاد لالي ولا لاولادي زي مابيحكي نزار قباني ( ياوطني كل العصافير لها منازل ...الا العصافير التي تحترف الحرية .... فهي تموت خارج اوطانها ) بالنهاية كيف ماكان تفكير الانسان الطابع الشخص بيغلب على تفكيره الطابع اللي الكل موجود فيو طابع التفرد الذاتي والسمو والمجد




الفرع الثاني : يومياً نسمع بأن مخترع أردني انجز كذا وتوصل الغرب إلى س من التطور في علم ص بعقول عربية أو من أصل عربي ؟ لماذا لا يتم استثمار هذه العقول في وطننا العربي ؟؟

بالنسبة للمخترعين تقريبا نفس الجواب السابق الضروف المادية هي الاساس .... وفي سبب ثاني يمكن من ضمن الاتفاقيات الدولية المتبعة بوقتنا انو العالم العربي يمنع من كذا وكذا وكذا مثلا يمنع من تخصيب اليورانيوم ... يمنع من امتلاك قنبلة نووية .... كثير في هي مجالات نمعنع منها .. هجرة العالم بتكون لاسباب خارج نطاق الدولة وخارج سياستها وكمان ا\هالعلم او المخترع مراقب من قبل الغرب بفترة طويلة ..




مشكورة دموع موضوعك اكثر من رائع

ولي عودة


...

[دموع الغصون]

تعليق رائع محمد كمان سلطت الضوء على أهم أسباب الهجرة بشكل عام لكن كهجرة عقول بتصور الهدف هو قلة الاهتمام والدعم و الامكانات المتاحة بالإضافة للي حكيته انت بتعليقك على الفرع الثاني

بشكرك على رأيك وعلى فكرة هالموضوع الرائع

بننتظر رأي باقي الأعضاء

[دموع الغصون]

طيب شباب وصبايا بتصور هالموضوع اخد حقه من الوقت

بننتظر قضية جديدة ياريت يا محمد كونك صاحب الموضوع تطرحلنا فكره

ننتظرك

[محمد العزام]

طيب دموع

هلا في اليوم صار معاي موقف مش انا صراحة صاحبي كان في بينا حديث يمكن اكون شديد اللهجة بالحكي بس بحكي من هالواقع المرير اللي احنا عايشينه ... موضوع العلاقات بين الشب والبنت او مابنسميه بايامنا الحب ... مابدي ندخل بالموضوع بشكل موسع بس ...


السؤال .... هل الحب يخالف ثقة الاهل بابنائهم ؟؟؟

[دموع الغصون]

سؤالك يا محمد إله أبعاد كثيره في فرق حسب نوع الحب
بأيامنا هي التسليه تحت مسمى الحب و الظروف تحت مسمى علاقة لهذا الحب
الحب المتوافق مع الدين أولاً الثقه بالنفس ثانياً تلقائياً لن تتعارض مع ثقة الأهل لكن بشرط أن تكون النيه مشتركة من الطرفين بالزواج و العلاقة الشرعية
غير ذلك يكون منافي لثقة الأهل و قبل ثقة الأهل ثقة النفس

***

راق لي كثيراً
شو رأيك أنت بالموضوع ؟؟؟

[محمد العزام]

صراحة مابعرف دموع .......كثير واجهت ناس فشلوا بهالاعلاقات وكثير واجهة ناس كان دخولهم للحب فقط لاشباع الغرائز وكثير شفت ناس دخلوا لهالعلاقة بس لمجرد الافتخار وكثير شفت ناس دخلوا بهالعلاقة فقط عشان يتسلى ... صرنا عايشين بدوامة ... انا مش منزه عن غيري دخلتها ولقيت فيها اسرار وخبايا فيها كثير من انك تتعرض لاسئلة محرجة وبالفعل ماتقدر تجاوب لحتى لو كنت دبلوماسي مليون بالمية ... مثلا اول العلاقة البنت بتحكي انا مابحب اخون ثقة اهلي .. بس الحكي على التلفون مش خيانة ثقة .. الخروج مع الشب مش خيانة ثقة ... نكون على وضوح اكثر انا بحكي بالنسبة عن حالي مرة حكيت مع بنت ثاني يوم برن عليها وردت علي امها وبتحكيلي بنتي حكتلي عنك هون بعتبرها مش خيانة ثقة ولاشي ... بينما في غير هيك بتخاف لتحكي لاهلها وبتحكي من وراهم وبتطلع من وراهم

شغلات مخبوصة ببعضها صراحة مش عارف احكي لاحكي

[دموع الغصون]

هو الموضوع نسبي صعب تحكي فيه أو تعمم أو تعطي رأي مثل ما ذكرت عندنا أنواع لهيك لكل حالة رأي مختلف وحكم مختلف
بالنهاية لو كان هالحب فعلا القصد منه الزواج طبيعي رح يكون بعلم الأهل و قبل علم الأهل المفروض يكون ضمن ضوابط ، طالما في نيه للأرتباط طبيعي رح يكون في احترام بين الطرفين بما يتناسب مع ظروف كل واحد

[علاء سماره]

بصراحه الحب حسب رؤيتي في هذه الايام هو عبارة عن اما
ضحك الشباب على الفتيات
أو ضحك الفتيات على الشباب

[محمد العزام]

مساءكم معطر بعطر محمد العزام

نغلق الموضوع وندخل بموضوع جديد

صراحة هو موضوع الكثير بعاني منه ... عانيت منه قبل فترة طويلة طويلة كمان بس هالظاهرة منتشرة بدرجة كبيرة ياريت نتناقش فيها ونتفاعل ونشوف هالاعضاء كيف ردودهم وياريت الكل يشارك بالنقاش ....

موضوع الموبايلات او بمسى ثاني الخلويات او الهاتف المحمول او التلفون تعددت المسميات لجهاز بنحمله وياريت نعرف نستخدمه ......
اليوم انا رايح على شغلي في وراي شباب اثنين مشغلين تلفوناتهم وبيتسمعوا اغاني وكل واحد مشغل على اغنية شكل ... اللي مشغل وطني واللي مشغل اغاني دمار وحزينة ... صراحة اتحيرت لمين اسمع حكيت خلص بس اغاني وطنية هههههههههه
المهم وجعولي راسي صراحة ...بالاخر هيك بكل لطافة اطلعت عليهم بحكيلهم ياشباب ممكن بس لو تطفوا الاغاني عشان راسي بلش يوجعني واحد منهم طفاه والثاني بحكيلي مابدي اطفيه واطلع لقدام وماتحكي .... لولا ستر رب العالمين كان نمت بمركز الشرطة اليوم ....

شو رايكم بهكي مواقف او تطلعوا والا هالسايق او هالكنترول مشغل اغاني على اعلى صوت ... طيب يا اخي انا مابحب اسمع اغاني وانا بالباص ليش لتجبرني اسمع معك




شو رايكم بهيك مواقف بتصير معاكم هاد اذا صارت واذا ماصارت ارائكم بتنور الموضوع



بنتظر ردود الافعال

[shams spring]

يا مساء الورد والريحان

ممممم موضوع رائع يا محمد واختيار موفق

وفعلا شغلة الموبايلات هاي مزعجة نوعا ما واتوقع بتزعج اغلب الناس
خصوصي لما يكون الواحد مروح وتعبان وعايف حاله ... ولا واحد مشغل مجوز :SnipeR (13): :SnipeR (13):

او حتى بنفس الباص بتلاقي السايق مشغل اغنية .. واحد وراك مشغل اعنية o.O ( يعني اذن اليسار بتسمع وحدة واليمين بتسمع التانية متلا o_O :icon9::icon9::icon9: )

ولا بالجامعات ... حدث ولا حرج:SnipeR (86)::SnipeR (86)::SnipeR (86): .... كل شلة قاعدة بزاوية ومشغلة اغنية
وين ما في جمعة شباب او بنات في تلفون مشغل اغاني :bl (7):

حتى واحنا في المحاضرات ... تحت الشبابيك في ناس مشغلة اغاني.... وبغنو معو كمان مشان تكمل :SnipeR (97):

تصور ... مرة وحدة جايبة السماعات الكبار على الجامعة ... ومشغليتهم على اللاب توب ....(مهو بتعرف اللاب صوته واطي ولازم تسمع الاردن حضرتها :eh_s(5)::eh_s(5)::eh_s(5): )

بصراحه هاي ظاهرة جدا سيئة ... صح في حرية شخصية لكن تنتهي عند حرية الاخرين ..يعني بدك تشغل اغاني شغل بس بصوووووووت واطي ... قدر الامكان ...لانه مش كل الناس بتحب تسمع يمكن في ناس تعبانه ...الخ

مشكوووووووور محمد على النقاش الحلو ... وبنتمنى نسمع اراء اكبر عدد من الاعضاء ^_^

[دليلة]

يسلمو محمد على الطرح....

الصراحة الضاهرة هدي للاسف منتشرة بشكل كبير ومش عندكم بس ..خاصة لما الواحد يكون راكب بأي وسيلة نقل
أنا كثير أتتعرض لهيك مواقف مرة كنت انا وامي راكبين وكان وقتها لسى جدي الله يرحمو متوفي وكان الشب بتاع تاكسي معلي صوت الغناء. شوي صرت أسمع أمي تستغفر وتتافاف انا عرفتها وقتها أنو راح تحكي وبجد صارت تسمعه انا هديتها وقلت لها معلش امي احنا وصلنا ماضل شي ماحبيتها تعلق معاه ولو على الصراحة هي معها حق لانو احنا بتعرفو غناء الراي عندنا فيه كلام يخجل لواحد يسمعه قدام واحد كبير.
والله في شباب مابيخجلو كثير تعرضت لهيك مواقف مرات تخيل يكون راكب معك أستاد درسك او جارك كبير بالعمر وتحترمم
او يكون احد أقاربك ويكون صوت الجهاز عالي على أغنية قلة في الادب...
بس في شباب ماشاء الله مع اني انا كمان ضد هدي الفكرة انو يحط قران لانو في ناس بتحكي والمفروض يكون في احترام وانصات لما يقرا القران....
وفي من بيحط أناشيد دينية وهدا لاكلام عليه
وفي كما من يحط اغاني بس بصوت خافت يادوب يسمعه هو وهدا كمان لاكلام عليه

[دموع الغصون]

ظاهره منتشره بكثره مع احترامي للجميع مو لاقيه الها اي مسمى الا غباء
المفروض المجتمعات الراقيه المتحضره تحترم حرية الآخرين همه بهيك حركات بفكرو حالهم مستقلين بشخصيتهم الهم كلمة الهم ستايلهم الخاص الهم هيك تميز وحضور
لكن يا عزيزي أو عزيزتي المدمر والمدمرة لتثبت وجودك حاول يكون بفكرك مو بحركات مالها معنى أو هدف
هلا مو شرط هالظاهره بس تندرج ممكن نحط كل الظواهر " ازعاج الآخرين و التعدي على حقوقهم " يعني سماعة الاذن مالها اسمع مصطفى كامل و اغاني المدمرين والمجوز وكل هالقصص ظروري تبين للكل انه على رأي تيته - موبايلك بغني - ياعمي والله هيك فئه بدها شطب واتلاف
هيك نوعيات تع ناقشهم بشي بالمجتمع بالثقافه بالدين بدراسته ماشاء الله بتحول لانسان مهذب ما بتسمع منه حرف
مابتصور هالظاهره الها حل إلا انه كل واحد يعمل بأخلاقه و تربايته هالظواهر بتجي مكتسبه من المجتمع من الأسرة من الأصدقاء

كتير بنتعرض لهيك مواقف بالجامعه فبتفضل تتركله المكان وتروح لأنه إذا بدك تناقش أو تجادل هيك بشر بحملو هالصفات أنت الخسران الوحيد
... ... ...


مشكور محمد على القضية

[محمد العزام]

مشكورين .
شمس
دليلة
دموع
على ارئكم الحلوة وبالفعل هي ظاهرة منتشرة بكثير ... هون بنحكي عن التقليد الاعمى لاستخدام وسائل التكنولوجيا والعلم ... التلفون اخترعوه للضرورة مش اكثر .. شوفوا تلفوناتنا فيها مما هب ودب

وبنتظر ردود باقي الاعضاء ... على امل يشاركونا

[دموع الغصون]

يعني يا محمد لو شايف مافي أمل يشاركونا

ياريت تطرحلنا موضوع جديد للنقاش بننتظرك

[محمد العزام]

شكلوا بطل في امل من كل شي


اقترحي انتي الموضوع دموع

[دموع الغصون]

مرحبا ...! للحفاظ على استمرارية موضوعك و التفاعل و المشاركة فيه و سماع آراء الأعضاء
و لللحفاظ على صلاحية الإرسال و الاستقبال في هذا الموضوع يرجى البعد كل البعد عن اختيار موضوع من قبل "دموع الغصون"
كما ننصح وبشده عدم الملل وفقدان الأمل

اطرحلنا موضوع يا محمد قبل 21/3/2012

[محمد العزام]

نظرا للضروف الجوية السائدة خلي طرح الموضوع لبكرا عشان مافي شي براسي حاليا

بكرا رح يصير معاي موقف ورح اطرحه هون

[محمد العزام]

موضوعنا لليوم هو من داخل مجتمعنا وبنعيشه وبنلاحظه كثير بعاداتنا وتقاليدنا والعرف المتبع بحياتنا

الزواج من الاقارب

بتشجع هالفكرة او لا طبعا مع النقاش وذكر الاسباب


بنتظر النقاش منكم والكل يستفيد منها

[&روان&]

موضوع حلو للنقاش ومثير
وانا بالنسبة اليانا ضد هاي الفكرة ابدا
مع انه الها ىايجابيات بس سلبياتها اكتر
وايضا لو حصلت مشكلة بين الزوجين رح تتسع نطاق المشكلة الى الاقارب
وتزداد المشاكل
وايضا من ناحية طبية لا ننسى الامراض الوراثية فهي خطيرة
شكرا الك محمد موضوع عنجد قابل للنقاش

[shams spring]

موضوع هام محمد اشكرك على هذا الطرح المميز كالعادة

بالنسبة لزواج الاقارب ... في اله جانبين
فيه الاقارب من الدرجة الاولى : يعني بتكون درجة القرابة قوية جدا متل ابناء الاعمام والاخوال من جهة الام والاب معا
هاد الجانب انا ضدة بشكل كبير جدا ... والسبب الاكبر هو الامراض الوراثية يلي ممكن تنتج عن هاد الزواج ..!!

بالنسبة للجانب التاني يلي بتكون فيو درجة القرابة بعيدة نوعا ما ... يعني في نسب غريب من الطرفين ...هاد الجانب ما في مشكلة...
لكن بشكل عام ... انا بفضل الابتعاد عن زواج الافارب ... كما قال رسول الله صلى الله عليه وسلم : غربوا النكاح .

وهاد الافضل للطرفين ....

مشكوووور ~~محمد ~~ وبنتمنى نسمع اراء اكبر عدد من الاعضاء في هذا النقاش
لك ودي ^_^

[علاء سماره]

موضو ع رائع للنقاش
انا بالنسبه الي ضد
لانو فعلا سلبياته كثيره

[علاء سماره]

موضو ع رائع للنقاش
انا بالنسبه الي ضد
لانو فعلا سلبياته كثيره

[محمد العزام]

بتشكركم جميعا على المرور واراء اكثر من رائعة
ننتظر كمان هاليوم ماحد علق عليه من الاعضاء رح اطرح موضوع جديد

[دموع الغصون]

قضية جميلة جداً
الزاوج سواء كان من الأقارب أو غيره له شروط ومقومات حتى يكون ناجح أو قابل للنجاح وهالشروط الكل بعرفها هلا لو توافرت هالشروط بالأقارب وكان الاتفاق من الطرفين ضمن خطوط مرسومة قد يكون ناجح
لكن أنا بنظري زواج الأقارب بمجتمعاتنا العربية أكثر عرضه للفشل
و الأفضل تجنب هذا الصراع العربي المتواجد بكل مجتمع بين الأقراب نتيجة زواج الأقارب

كلنا شوق للمزيد والمزيد من القضايا

[محمد العزام]

سيدتي دموع
اشكرك على مرورك العطر ... وراي بالفعل هو الصواب ...الافضل التجنب


بانتظار المزيد من المشاركات

[محمد العزام]

شمس ننتظر من الموضوع الجديد

ماتتاخري بالموضوع

[shams spring]

السلام عليكم جميعا

اعضاء منتدى الحصن الغالي

موضوعنا المطروح للنقاش اليوم هو :

~.~.~ أسباب العنف الجامعي بشكل خاص والمجتمعي بشل عام ~.~.~

كثيرا من الاحيان وبعد حدوث اي مشكلة معينة في الجامعة او مكان اخر
تترد على مسامعنا كلمات تصب اصبع الاتهام على ~.~البنات~.~

يعني .... اي واحد لما يسمع عن مشكلة معينة بحكي :
اكيد فيه وراها بنت ...!!

اذن...
1) هل تعتقد بان الفتاة هي السبب الرئيسي والاول في تلك المشاكل ؟؟؟

2) لماذا يوجة المجتمع اصبع الاتهام الى الفتاة فورا عند سماعه بمشكلة معينه ؟؟؟

3) هل الفتاة بشخصها مسؤولة بشكل او باخر عن حدوث هذه المشاكل ؟؟( نعم السبب \ لا من السبب اذن) ؟؟


4) لماذا ازدادت نسبة العنف الجامعي في الاونة الاخير ؟؟

5) هل انت مع وضع قانون لفصل البنات عن الذكور في المرحلة الجامعية ؟؟

6) هل مجتمعنا في سن المراهقة هو جيل غير ناضج وواعي لا يحمل هدفا يرتكز عليه في مسيرته ...!!

7) اذن كيف سنبني مجتمعنا .. في ظل هذا العنف المتزايد ..؟؟

8) لو كنت عميدا ً لجامعة حكومية ما ... ما الاجراءات الوقائية التي ستتخذها للحد من العنف الجامعي ..؟؟


في انتظار آرائكم
ارجوا سماع اكبر قدر ممكن من آراء الاعضاء
لكم ودي -_-

:eh_s(17):

[دموع الغصون]

أشكركِ شمس على طرح القضية الهامة جداً
بسم الله نبدأ

1) هل تعتقد بان الفتاة هي السبب الرئيسي والاول في تلك المشاكل ؟؟؟
على الأغلب تعتبر الفتاة من أهم أسباب هذه المشاكل و النعرات ، نظراً إلى أن الأردن مجتمع عشائري ولا يزال يتمسك ببعض العادات والتقاليد .

2) لماذا يوجة المجتمع اصبع الاتهام الى الفتاة فورا عند سماعه بمشكلة معينه ؟؟؟
هذا التوجه ليس سلبياً و إنما هو بالفطرة الإجتماعية نابع من العادات والتقاليد وقيم قد رسخت منذ زمن في عقولنا بالإضافة إلى أن النتائج النهائية لمحصلة مجموعة من المشاكل في مختلف الجامعات الاردنية السبب الرئيسي فتاة فهذا الاتهام لم يأتِ من فراغ و إنما نتيجة تراكم و تكرار .

3) هل الفتاة بشخصها مسؤولة بشكل او باخر عن حدوث هذه المشاكل ؟؟( نعم السبب \ لا من السبب اذن) ؟؟
لا يمكن التعميم هنا
فهناك الكثير من الخلافات تنتج نتيجة تفاهة الأفكار و الهدف منها - الزعرنه - وحركات مراهقين وشباب
أما بعض الخلافات قد تسببها فتاة ، يعود ذلك إلى الضغط الإجتماعي على بعض الفتيات أثناء المراحل الأولى من حياتها الدراسية و تأتي لتثبت ذاتها وتعوض ما فاتها من كبت اجتماعي و سلسلة من الممنوعات المرتبطة بالتقاليد لتفجرها في المرحلة الجامعية لينتج عنها من خلافات عشائرية و خلافات بين مجموعة من الأقارب نتيجة حرمان و ضعف و قلة وعي وإدراك وقدرة على التصرف وتدارك الأمور و عدم النظر إلى الهدف الأساسي من كلا الطرفين الجامعة للتعليم فقط وليست لتعارف والعلاقات أو فرد العضلات و العشائرية والاقليمية


4) لماذا ازدادت نسبة العنف الجامعي في الاونة الاخير ؟؟
لم تزدد العنف الجامعي موجود منذ القدم لكن نتيجة التطور الكبير وسرعة نقل المعلومات و تطور وسائل الإعلام أصبحت هذه الظاهرة تأخذ حجم أكبر مما سبق و تتضخم الأمور بشكل سلبي لنثبت بأن هناك عنف جامعي لخدمة أهداف قد يجهل البعض من المستفيد منها ، ليس هناك أي زيادة و إنما هو تهويل اعلامي من وسائل اعلامية قد يكون هدف بعضها الشهرة والكسب المادي لو كان غير ذلك لاستخدمو اعلامهم بتوجيه الشباب إلى الطريق الصحيح لا بتهويل الأمور وزيادتها سوء

5) هل انت مع وضع قانون لفصل البنات عن الذكور في المرحلة الجامعية ؟؟
لا الخطأ هنا ليس بنظام التعليم الخطأ بشبابنا وبناتنا إن لم تستطع ان تنخرط في مجتمعك كمجتمع ذكوري وأنثوي في المرحلة الجامعية فلن تستطيع الانخراط في عملك و مجتمعك الأكبر لتؤسس مستقبلك ، ليس جديد أن يكون التعليم مختلط لكن الجديد بأن نظرتهم مشوهة لهذا التعليم

6) هل مجتمعنا في سن المراهقة هو جيل غير ناضج وواعي لا يحمل هدفا يرتكز عليه في مسيرته ...!!
لا أومن بجيل المراهقة فهو مصطلح دخيل لكن الإنسان مهما كان عمره يعتمد على الجذور الأساسية لو غرست الأسرة البذور الصالحة منذ مراحل الطفولة لن نواجه أي صعوبة في المراحل العمرية القادمة ، الخطأ ليس بسن المراهقة وليس بمرحلة الشباب الخطأ بمجتمعنا بتمسك البعض ببعض العادات والتقاليد السلبية مع اهمال الإيجابية منها

7) اذن كيف سنبني مجتمعنا .. في ظل هذا العنف المتزايد ..؟؟
من الأصح أن نرمم المتجمع المجتمع مبني ولكن على أسس خاطئة من الأفضل أن نصلح أنفسنا و نصلح مجتمعنا من ثم ننتقل لنصلح مجتمع الجامعة و مرحلة الشباب

8) لو كنت عميدا ً لجامعة حكومية ما ... ما الاجراءات الوقائية التي ستتخذها للحد من العنف الجامعي ..؟؟
- تطبيق القوانين على الجميع دون استثناء
- وضع مجموعة من القوانين و الشروط المادية والنفسية
- التركيز بشكل كبير على ورش العمل واشراك الشباب والبنات يد بيد لتحفيزهم على تحمل المسؤولية أكثر والإندماج والإنخراط دون وجود هذا الحاجز الوهمي بين الذكر والأنثى لكن مع وجود قوانين و رقابة تامة
- عقد ندوات توعوية وإرشادية
- استثمار أوقات الفراغ لدى الشباب من خلال برامج تدريبة هدفها الأول الأعمال التطوعية هنا لتعزيز الجانب النفسي الاجتماعي الذي يفتقره الكثير من شبابنا

***|***|***|***|***
أشكركِ شمس مرة أخرى على الموضوع
راق لي كثيراً

[محمد العزام]

مشكورة شمس على طرحك للموضوع الذي طالما اصبح يؤرق مجتمعنا وطبعا لايوجد حل مناسب لما يحصل كانه اصبح مثل الروتين في حياتنا وكانها اصبحت مثل التباهي والتظاهر فقط لاغير

1) هل تعتقد بان الفتاة هي السبب الرئيسي والاول في تلك المشاكل ؟؟؟ليست بالذات السبب الرئيسي بل نستطيع ان جوم بانها من اكبر الاسباب لما يحصل

2) لماذا يوجة المجتمع اصبع الاتهام الى الفتاة فورا عند سماعه بمشكلة معينه ؟؟؟
لاننا اتعودنا على هيك .. بعتقد انو بسبب مايحصل بانحلال الاخلاق في الجامعات ومايحصل من محرمات داخل شيء يسمى حرم جامعة

3) هل الفتاة بشخصها مسؤولة بشكل او باخر عن حدوث هذه المشاكل ؟؟( نعم السبب \ لا من السبب اذن) ؟؟

مثل ماحكيت بالبداية ليست بالشرط ان تكون هي المسبب الرئيسي واذا كانت كذلك فالسبب معروف وكمان ذكرته بالانحلال الي وصلت اله امتنا واخلاقنا يعني نحكيها بصريح العبارة اصبحت الجامعات عبارة عن نادي مصغر ليست للتعليم وليست للتعلم الا من رحم ربي واصبحت هالفئة تناقص اول باول واتوجهت الطريق الى الطريق الخطا يعني كيف هالشب بده يحكيمع هالبنت وكيف هالبنت بدها تحكي مع هالشب لحتى كل طرف يرضي ويشبع مابداخله

4) لماذا ازدادت نسبة العنف الجامعي في الاونة الاخير ؟؟
لعدم الاهتمام من قبل الاهل ... التمسك بالعشائرية خاصة بفترة الانتخابات الجامعية وكمان العنصرية اللي في اطراف كثيرة بتساعد على نشوئها

5) هل انت مع وضع قانون لفصل البنات عن الذكور في المرحلة الجامعية ؟؟بهالوقت اكيد مع ... عمرك سمعتي ببنت رسبت 20 طالب بمادة وحدة ... صارت باحدى الكليات بجامعة اليرموك .. والسبب بسيط التبرج من قبل البنت ولفت الانتباه مش اكثر

6) هل مجتمعنا في سن المراهقة هو جيل غير ناضج وواعي لا يحمل هدفا يرتكز عليه في مسيرته ...!!في سن المراهقة وحتى ماقبل سن المراهقة اكيد شباب غير واعي ومدرك ولا بنسبة 1% وانتظري شوي وشوفي هالاجيال اللي رح تطلع وشوفي كيف هالتفكير رح يكون

7) اذن كيف سنبني مجتمعنا .. في ظل هذا العنف المتزايد ..؟؟الاجابة صعبة ومعقدة بنفس الوقت ... بالبداية لما يكون في حس من قبل الطالب لما يوميا يفكر كيف اهله اعطوه مصروفه لحتى يروح على جامعته ويتعلم بنبلش من وقتها نربي هالاجيال

8) لو كنت عميدا ً لجامعة حكومية ما ... ما الاجراءات الوقائية التي ستتخذها للحد من العنف الجامعي ..؟؟اول شي بعمله ... فصل الجنسين ... ثاني شي ... التكثيف بتدريس القران الكريم والسنة النبويو وادخال على جميع السنوات بالجامعة ثالث شي .. اي طالب يتسبب باي مشكلة بالجامعة يحرم من الجامعه نهائيا ... لحتى يكون عبرة لمن اعتبر رابع شي .. الكادر التدريسي لازم يكون عليهم رقابة من قبل جهة مختصة تناقش مبادئهم بالمحاضرة وكمان بتناقش على مستوى العلامات الي تمنح للطلاب خامس شي ... لو بايدي بعمل زي موحد للطلاب والطالبات زي المدارس (صعبة صح )سادس شي .. الاجتماعات المتواصله مع الطلاب اول باول نفهم مشاكلهم وبنحاول نساعدها عليهم ومش غلط هالشي وان شاء الله هالمسيرة التعليمية تمتد للامام ومافي شي يشوبها لا اخطاء ولا مشاكل

مشكورة شمس على طرحك الجميل للموضوع

[shams spring]

اشكرك ~~دموع ~~ على رأيك الواعي وتفكيرك الناضج
وبالفعل الجذور الاساسية التي بني عليها الشخص في اسرته هي العامل الاول المساهم في نسج شخصيته وافكاره .

العنف الجامعي صح موجود من زمان لكن في الفتره هاي زاد وبشكل ملحوظ
السبب برأي هو خلل ما في القوانين الجامعية
خلل ما في التربية السائدة في المجتمع ككل
خلل ما في التوجه الفكري للشباب

صح البنت ممكن يكون الها دور كبير في المشاكل السائدة في الحرم الجامعي ولكن الفكر الموجود لدى الشباب هو من افتعل المشكلة من الاساس ... الشب لما يكون عارف مصلحته وعارف ليش رايح ع الجامعة ... ما رح يفتعل مشاكل بسبب بنت . اكيد فيه لوم كبيــــــــر على البنات... بدو نقاش تاني يمكن لكن الفكر الشبابي انحرف عن الطريق الصحيح
للاسف ....!!

بالنسبة ..للكبت الاجتماعي التي تعاني منها فئة كبيرة من البنات ... هاد عامل اساسي كبير في الانحرافات يلي بنشوفها بالجامعة ... لانه كل شي زاد عن حدة انقلب ضدة ... الضغط والحرمان ليس هو اساس التربية ... التربية تربية فكر
البنت بضل لحد اخر مرحلة من المدرسة ما شاء الله عليها بس تفوت الجامعة ... بتنحرف...!! طيب ليش ...!!
اكيد لانه ما في رقابة اهل ..ما انحرفت بالاول لانه كان فيه رقابة اهل .. مش رقابة ذاتية ...!!

الموضوع بتشعب وبتشعب .... وينبثق منه مواضيع اخرى .. نأمل ان نغطيها في نقاشات اخرى

اشكرك مرة اخرى دموع ....^_^

[shams spring]

اشكرك محمد على رأيك الواعي والمدرك للواقع المؤلم الذي نعيشه
بالزبط انا هاد يلي بدي اوصله ... التفكير الموجود لدى اغلب الشباب ...هو تفكير اقرب الى الانحراف
اللامبالاة ... عدم الوعي ... لا هدف ... لا طموح ...انحصر فقط في زاوية عاطفية بحته ...!!

واكيد الاهل الهم دور كبير في تنمية فكر الابناء ...
والعشائرية هي عامل قوي جدا ومن اهم اسباب العنف الجامعي بل هو الموجه الرئيسي للفتنة داخل الحرم الجامعي
وانا كتير حضرت نزاعات كان اثرها قوي جدا بسبب العشائرية والعنصرية التي لا تمت للدين بصلة ...!!

ايضا سبب مهم جدا في العنف الجامعي هو ضعف الوازع الديني ...الذي هو يمثل الرقابة الذاتية المحركة والموجهة للانسان وتصرفاته .

بالنسبة لل 20 طالب يلي رسبو بسبب بنت ... يا حوينة تعب اهلهم فيهم وفيها ...!!

الخطا على البنت اولا لانه اخلاقها وتقاليدها ما منعتها من التبرج اللافت لهالدرجة ...!!
وتانيا على الشباب لانه فكرهم كان منصب في زاوية صغيرة تافهه لا تسمن ولا تغني من جوع ... وهم بس يوعوا شوي رح يكتشفوا هالشي لحالهم ...!!

~.~.~ محمد ~.~.~ يا ريتك تصير عميد لشي جامعة لانه بصراحة افكارك نارية ... واعتقد انها رح تأثر بشكل ايجابي على مشكلة العنف الجامعي .

مشكووور مرة اخرى

ننتظر المزيد من الاراء ...

[دموع الغصون]

معلش محمد ممكن علق على رأيك
هلا حكيك صحيح 100% لكن مثالي كتير صعب يتطبق بمجتمعنا الأردني
أنت عم تطرحلنا حلول ممكن تكون ونضمن نتائجها لكن نتائج محصورة بالحرم الجامعي
هلا مو معقول اعمل فصل بين الذكور والاناث بالجامعه ويلتقو برى مهو هيك هيك سبب الطوش بتكون برى وبجو بالجامعه يصفو حساباتهم
بهي الحاله رح ننقل المشاكل من داخل الحرم الجامعي لخارجه - ببعض الاحيان - عم بنوسع النطاق
ضحكتني هي الزي الموحد بتعرف جد بهي الفتره الله يعين الشباب و البنات كمان التنين ماشاء الله عليهم
هلا الخطأ هون مو بالشب ولا بالبنت الخطأ على أخو البنت و أبوها و على أهل الشب مو من حق اي جامعة توحد الزي لكن ممكن تعمل قوانين تمنع و تنظم الأمور بما يتناسب مع الظروف المحيطة وبتصور هلا محتاجينها بجامعتنا بدنا قوانين للباس
يلي حكيته كل صح 100% بس لينجح ويطبق لازم يكون عن قناعة ذاتيه مو اجبار لأنه بعمر التغيير ما أجى هيك لازمه عزيمة واصرار وقدره وإرادة
بشكرك شمس مرة تانيه على طرح هالقضية الجميلة

[محمد العزام]

تعليق جميل دموع

بس لاحظي انتي اكيد في طوش برا الجامعة كمان وهالشي ماحد بنكره بس داخل الجامعة لازم تمنع وهاي وسيلة من الوسائل انو نمنع الاختلاط بين الجنسين ... هلا احكيلك انا بشوف تفكير هالشباب وكثير بقعد معاهم ممكن يعمل اي مشكلة عشان بنت ومش ممكن يعمل مشكلة وحدة عشان اخت لاله او قريبته او اي بنت بتخصه ... يعني استغفرك ياربي على كلامي البنت ماثرة بكل شي بطريقة كلامها بلبسها بتفكيرها .. طبا مش كل البنات بس لما مايكون في اختلاط اكيد مافي شي هالشب يتاثر في ماهو هيك هيك المشاكل حاصلة برا خلينا نمنعها داخل الجامعة وبرا ربك بدبرها ... بالنسبة لرقابة الاهل على لباس الشب او البنت .. هاي نقطة حساسة مابعرف وين بكون الاخ او الاب لما يشوف بنته او اخته بتلبس هاللباس وتطلع فيه .. بطل في رجولة بطل فيه غيره صار بالفعل معنى الديوث يتحقق بمجتمعنا والله يستر من تاليها

[دموع الغصون]

الله يستر
بس انا لسا ضد انا برايي نمنع برى وجو بنفس الوقت مو حل نمنع هون ونتخليهم برى يعملو مشاكل لسا داخل حرم الجامعه في قانون و في انصباط وفي عقاب وممكن يخافو على دراستهم وحرمانهم من الدراسه برى الحرم الجامعي رح يطقعو لكل شي
غير هيك هلا لو منعنا الاختلاط بالمرحله الجامعيه رح نعمل نفس هالمشاكل مستقبلا بالشغل
الخطأ مو بالاختلاط كفكره الخطأ بمجتمعنا المنغلق والنفسيات المريضه شو البنت اول مره بتشوف شب والشب اول مره بشوف بنت ، يعني ولو انتو شباب وعاقلين ليه هالتفكيرات المتخلفه بتنادو بالعولمه ولسا فيكو هالتفكيرات الرجعيه
والله مابعرف عن هيك ناس كيف بفكرو
ياريت لو تكون عندنا فئه بسيطة فاهمه ومدركه للواقع وتوعي هيك شباب
محمد جد بستمتع بالنقاش معك ومع شمس
اسفه على الاطاله

[محمد العزام]

لاعادي ماتتاسفي كلما زاد نقاشك بكون مستمتع فيه وبارائك



شمس شو رايك بالتعليقات والا برايك نقترح موضوع جديد ... على اساس الموضوع موضوعك او نستنى اراء الاعضاء

[shams spring]

محمد خد راحتك بادارة النقاش ...بس مال الاعضاء مش متفاعلين معنا ...!!!
والله حابه اسمع اراء جديدة ؟؟؟

[محمد العزام]

على قولتك خلي دموع تبلش طخ بالاعضاء بلكي يصحوا ...

[محمد العزام]

اليوم رح نطرح قضية جديدة

يعني صار معاي موقف .. دخل علي شخص وانا بالشغل وشوي ببوس ايدي وبحكيلي خلص بدي ارجع النت للبيت يعني هو مشترك بخط انترنت من امنية وفاصله عشان اولاده ودراستهم يعني هالزلمة مابده هالنت يضيع مستقبل اولاده ...بس اللي صار انو بحكيلي صار يطلعوا من وراه وبغيابه وبياخذوا مصاري وحتى وصلت بانهم يسرقوا لحتى يروحوا على محلات النت ...

بهالحلة صار الخوف واضح عند هالاب على مستقبل اولاده خاصة انو في واحد منهم توجيهي وبحكيلي من ورا هالنت ضيع مستقبله وابنه الثاني على الطريق خاصة انو اتعلم على شغلة بالفيس وهي لعبة المزرعة السعيده على حد كلامه وانها صارت ادمان عند ابنه وحتى وهو نايم اصابعه بيتحركوا لحالهم انو عايش الدور وانو قاعد على اللعبة وبيلعب


طبعا القضية مشتعبة كثير من عدة نواحي

اولها ... الاستخدام الخاطئ وغير المثالي للتطور التكنولوجي والعلمي والانفتاح اللي بغير محله
ثانيا ... رقابة الاهل على الاولاد بهذا الاستخدام
ثالثا ... نفس الرقابة على محلات النت .. مثلا بعدم السماح للاطفال بالدخول الى مثل هذه المحلات
رابعا ...التاثير الحاصل على مستوى الطالب الاخلاقي والتاديبي والتعليمي



ننتظر نقاشاتكم وان شاء هالمرة نلاقي اعضاء متفاعلين لانها قضية حساسة

[دموع الغصون]

قضية مهمة جداً و عجبتني كتير ولازم نتناولها من كل جوانبها
هلا قبل لادخل بالنقاش الجدي رح علق شوي على لعبة المزرعة السعيدة ، بعرف واحد هو كبير بالعمر مارح نحكي أب لا هو جد صح اوك عمره بآخر الاربعينات لكنه جد مع هيك متعلق بالمزرعه السعيده و بلعبها ليل ونهار لدرجة اخد انذار و حسم راتب لمدرة اسبوع طيب ازا هيك الكبار فما نلوم الشباب و الأطفال القضيه اكبر
هي غزو فكري بطريقة لبقه وترفيهيه ماحد رح يعترض عليها أو يرفضها ، لأنه وقت الفراغ عند شبابنا كبير وللأسف مافي استغلال لطاقات الشباب فبوجهوها بطرق خاطئه .. الخطأ مو بس بالمزرعة اوباقي الألعاب الخطأ باستخدام التكنولوجيا بشكل عام ، و الخطأ الأكبر بالفيس بوك
الفيس بوك بأخر فتره أخد رواج كبير و حجم اعلامي و تضخيم أكبر من حجمه
انا امنيتي أفهم شو بتهيئلهم بالفيس بوك هو متله متل أي موقع بالعكس مضاره أكتر من حسناته بس هو مجرد تقليد أعمى بتلاقي الولد لسا بصف أول ما بعرف يكتب اسمه بده حساب عالفيس و بتلاقي الشب مامعه اجرة مواصلات و بوفر منهم ليدخل نت وين يدخل للفيس
لا جد شباب بنرفع فيهم الرأس
بتلاقيه 6 ساعات عالنت بتعرف تفتح غير الفيس لا .. وبعدين تعال احكي معه او ناقشه بخلي حاله هو مخترع الفيس وهو يلي بفهم الوحيد بالنت .. خليه يفتح غير موقع بضيع احكيله يطالعلك معلومه بطير راسه وهو مو عارف .
يعني شباب أو جيل مو شايف من النت الا الفيس بوك او مواقع التواصل و أكبر هدفهم بكون شي تافه
طبعا هالقاعده ما عم نعممها لكن على الأغلب هيك
.
.


طبعا القضية مشتعبة كثير من عدة نواحي

اولها ... الاستخدام الخاطئ وغير المثالي للتطور التكنولوجي والعلمي والانفتاح اللي بغير محله
الانفتاح بمجتمعنا على شغلات وشغلات .. التكنولوجيا و التطور سلاح ذو حدين
كل شي تسخر لمصلحتنا و لخدمة أهدافنا متل ما بنوجهه بمشي
الخطأ مو بهالتقدم والتطور الخطأ فينا نحنا

ثانيا ... رقابة الاهل على الاولاد بهذا الاستخدام
هون حطيت ايدك على الجرح .. المفروض يكون في رقابة على الأبناء بكل تصرفاتهم لأنه نحنا بشر ممكن نغلط لو كان في رقابه ومتابعه رح نتفادى هالغلط لو ماكان رح نتمادى فيه سواء كان هالغلط بحياتنا أو باستخدامنا للمواد المسخرة لخدمة البشرية منها النت
هلا المفروض الأهل يكونو أصدقاء لأبنائهم و رفقاء لالهم من خلال متابعته والاهتمام باهتماماتهم و اعطائهم وقت كافي ليوضحو وجهات نظرهم
من حق هالجيل يتعلم كل شي ومايكون أقل من غيره لكن بالمقابل يكونو على قد كافي من الوعي و العلم بمصالحهم يعني نبينلهم الصح من الغلط بس ما نجبرهم يسلكو طريق الا عن قناعه واختيار لو سلكو الغلط معلش خليهم يجبرو هالشي لكن تحت عينا مو بظهرنا بهيك بنضمن نحنا معهم لو عملو غلط ممكن نساعدهم لأنه بطبيعة الانسان الفضول ازا ما اشبع فضوله مستحيل يرتاح رح يشبعه رح يشبعه .. يشبعه بعلم أهله و رعايتهم ووقفهم جنبه أفضل ما يشبعه بطرق لا يعلمها إلا الله .. هلا بالنسبه للنت المفروض يكون في رقابه بنظري مو بس على الأطفال حتى على الشباب أو ما تطلقون عليه - المراهقين -

أما عن المزرعه والله انا بحبها ابن اخوي بصف تاني متعلق فيها كتير لكن ضمن شروط هلا هو بلعب بحسابي الخاص معروف خلص بس يكمل الهوم ورك و الواجبات المنزليه بساعة فراغ بلعب غير هيك لا هو لوحده يوم الامتحانات ما بطلب يلعبها بس بوجع راسي وهو يحكيلي سجليلي دخول تلقائي بدي الهديه .. هلا لازم يكون في تحفيز وترهيب مقابل انك تعمل شي انته بتحبه على النت لازم تتعلم شي جديد مفيد على النت
لحتى من البداية نغرس بنفوسهم انه النت مو بس العاب ولا بس لتسلايه ولا بس فيس بوك النت في هيك وفي هيك

ثالثا ... نفس الرقابة على محلات النت .. مثلا بعدم السماح للاطفال بالدخول الى مثل هذه المحلات
هلا انا ماعندي فكره على قوانين الكافي نت بس المفروض يكون في رقابه على العمر المسموح يدخل فيه ولو دخل تحت سن 15 ممنوع يدخل الا معه ولي امر .. يمكن لاقي انتقاد على هالنقطة لكن صاحب الكافيه والعاملين مو مسؤولين يراقبو كل شخص ولا من حقهم عندهم اولويات كمان الأهل ما بعرفو شو ابنهم بشتغل لهيك افضل شي صاحب العلاقه هو يجي يراقب اولاده ومافي حد رح يحميهم متل اهلهم
في حل آمن لكن متعب و بغلب الدوله لهيك مستحيل يزبط بس هو بستحق العمل به
أو بخلو اماكن خاصة للاطفال لاستخدام الانترنت ضمن شروط وقواعد و تشفير لبعض المواقع
أو بكل كافيه نت بخلو عدد من الأجهزه خاصه بالأطفال ضمن قوانين وشروط وقواعد
بهيك بنحمي جيل و بنبني جيل صح وواعي

رابعا ...التاثير الحاصل على مستوى الطالب الاخلاقي والتاديبي والتعليمي
بالنت وبدون النت للأسف المستوى الأخلاقي و التأديبي و التعليمي في انحطاط
انا شايفه النت ماله أي دور بهيك شغلات النت مجرد وسيله متل ما سخرناه ،،، يعني لو ما عند هالشخص هيك نزعه ماكان رح نتوجد النت هو بنمي هالنزعات لكن لا يعمل على اظهارها أو توليدها

[محمد العزام]

مبدعة دموع في ارائك وتعليقكك ... بس فش شغلة يمكن زي ماحكيتي رح تتعب الدولة من ناحية الرقابة او بانشاء محلات للنت للااطفال وبمكان امن ... انا بفترة بحياتي اشتغل بمحلانت نت كافي لفترة كان في تشديد يعني احكيلك كيف البحث الجنائي صاروا كل فترة يطلبوا كشف بالاسماء اللي بتدخل لمحلات الانترنت وركزوا على الاطفال اللي مامعهم هويات وكانوا يحاسبوا اذا حصل نقص بهالشي .. ولمرة رحت ما اتعاقب عشان دخلت ولد من غير علم اهله ... هاي كانت خطوة حلوة صح هي بتاثر على الشغل بانسبة لاصحاب المحلات بس بالنهاية بنطلع جيل احسن من هيك ...وزي ماحكيتي الاهل الهم دور اكبر من اي دور .. هم الاساس ودايما بضلهم هيك مش لفترة معينة براقب ابني وبعدين بتركه على حجة انو كبر وصار يفهم الصح من الغلط


مشكورة دموع وننتظر باقي الردود

[shams spring]

اول شي شكرا محمد على هاد النقاش الهام والي بمس مشكلة اجتماعية هامة جدا
طرح هام جدا وبتمنى من جميع الاعضاء ادلاء ارائهم فيه

اولها ... الاستخدام الخاطئ وغير المثالي للتطور التكنولوجي والعلمي والانفتاح اللي بغير محله

هاد بسبب قلة الوعي , يعني كتير ناس بستخدمو النت وهم مش عارفين شو بدهم ..!!
بس بدهم يتسلوا وكأنوا حياتهم رح يكملوها بالنت ...وكأنوا المستقبل بينبني بالنت
وكأنوا النت هو الي رح يحقق احلامهم...

طيب احكيلهم شو النت ؟؟
النت :هو وسيلة تواصل مع العالم ... شوف شو جديد , اسمع اخبار العالم ,شو اخر الاختراعات ,اتعلم منه , اسأل العم جوجل وهو بجاوبك , دروس ,امتحانات ,دورات
وكمان تواصل مع معارفك اصحابك ....الخ

بالنسبة الي الفيس بوك هو وسيلة تواصل مع اخواني وقرايبي الي برة
صحباتي وجامعتي والشركات يلي بدرب فيها وبتعامل معها ...
يعني انا بالنسبة الي ما بقدر استغني عنه نهائيا ...

اما هاي الالعاب يلي عليه انا ما الي مزاج فيها ...جربت العب بالمزرعة السعيدة مرة بس ما كان الي طولة بال ..!!
ا


ثانيا ... رقابة الاهل على الاولاد بهذا الاستخدام

انا برأي الرقابة لازم تكون من اول ما بتوصل النت على البيت ...يعني لا تخليهم يتعودوا على اشياء كتير بالنت وبعدين تحرمهم منها...!! صعب كتير تنجح
لكن من اولها نزل برنامج يحجب المواقع الي ما الها فايدة ... هاد بالنسبة للاطفال

لكن بالنسبة للمراهقين فهدول ما بينفع معهم نفس الاسلوب المفروض تكون الشغلة بالعقل
يعني على الاهل توعيتهم ... شو الصح وشو الغلط بعد هيك اذا غلط اول مرة المفروض يتعلم من تجربته لكن اذا عادها بكون فيه شيء غلك باساس تربيته ..!!


ثالثا ... نفس الرقابة على محلات النت .. مثلا بعدم السماح للاطفال بالدخول الى مثل هذه المحلات .
الرقابة على المحلات صعبة كتير ... وخصوصي انه في اغلب المحلات هدفهم الاول والاساس هو مادي ... وبالنسبة الهم هاد الطفل مكسب الا من رحم ربي
برأيي الرقابة في هيك حاله لازم تكون من الاهل ..يعني ابنك وخصوصي مرحلة التوجيهي لازم تعرف وين راح وين اجى..؟؟
ودائما لازم الاهل يحطو في بالهم انو كل ممنوع مرغوب ...لا تمنعهم عن النت خليه في البيت ووعيه انه انت هلأ في مرحلة تحديد مصير ... النت ما بروح وهيو موجود ...لكن التوجيهي سنة وبيمضى ... فاستغلها

رابعا ...التاثير الحاصل على مستوى الطالب الاخلاقي والتاديبي والتعليمي

انا مع دموع ... التأثير بيرجع للوعي ... الانسان الواعي عارف شو اله وشو عليه
عارف شو الصح من الغلط ...وعارف من اي طريق لازم يمشي
يعني النت مجرد وسيلة ... والشخص على اهوائه بمشي في النت



ننتظر نقاشاتكم وان شاء هالمرة نلاقي اعضاء متفاعلين لانها قضية حساسسة

اه والله يا ريت نلاقي تفاعل من اكتر عدد من الاعضاء حابين نسمع اراء جديدة

[محمد العزام]

مشكورة شمس على التعليق الرائع

بتمنى الاهتمام الاكبر من قبل الاهالي على اطفالهم ويكون في متابعة اكثر من هيك

[محمد العزام]

اليوم رح اطرح موضوع جديد ... هي اكثر شي بحكيه عبارة عن مواقف بتحصل معاي سواء بشغلي او بغير شغلي ..بحسها قريبة جدا من المجتمع اللي بعيش فيه


اليوم الموضوع صراحة المني كثير وتعبني حد التفكير فيه .. خاصة لما اتذكر الموقف واللي صار

المهم .... اليوم وانا بشغلي .. انا مكان شغلي بمول في اربد ..يمكن اهل اربد بيعرفوه (ارابيلا مول ) كنت واقف برا ماخذ استراحة من شغلي وبالصدفة عيلة تتكون من شخص ومرته واولاده .. بنت صغيره بتحكي لابوها نفسي اشتري هاللبسة طبعا كانوا قدام محل البسة وصارت هالبنت تبكي وتحكي بدي اشتري هاللبسة ومابعرف شو وابوها بيحكيلها مامعي اشتريلك اياه وصار يصرخ على بنته ..صراحة اتالمت على البنت ودخلت على محل الالبسة وسالت عن سعرها واللي بيشتغلوا فيه بعرفهم على اساس انا بدي اشتريها واعطاني اياها بسعر رخيص واعطيتها للبنت .. كانت الفرحة بعينها ... بعد هالموقف اللي ار اجا ابوها لعندي وصار يحكيلي مابعرف شو احكيلك ومن هالحكي واخر شي بسالوا يعني انت جاي على مول ورح تتعرض لهيك موقف وليش ماتحسب حسابك .. دمعة عينه نزلت قدامي لما حكالي هادي اول مرة بطلع اولادي فيها وكانت غصب عني ...مرتي خلتني اداين فلوس عشان نطلع ونروح نشوف هالمول اللي قلبوا مخنا عليه ...واضطريت اعمل هيك ... عشان اخت مرته كل يوم بالمول وجوزها موفرلها كل شي ومن هالحكي

يمكن تستغربوا من طرحي العقيم للموضوع بس موقف مش قادر انساه يا الله كل مابفكر فيه بتالم كثير

بس سؤالي القابل للنقاش ... هل فعلا انو احنا وصلنا لمرحلة نعمل هيك بحياتنا لحتى نحقق كماليات فارغة بحياتنا او من اجل التشبه بغيرنا ..

شو هي نظرتك للكماليات بالحياة
هل نحن مجتمع توفر له كل ما اراد


بستنى ارائكم وتعليقكم على الموضوع

[دموع الغصون]

موقف انساني رائع منك محمد ، و صعب أي حد مكانك يتصرف هيك ممكن يفضل الصمت و الاحتفاظ بمشاعرة عن تقديم المساعدة

هلا للأسف وصلنا لمرحلة الكماليات
الكماليات مهمة وظروريه لكن ضمن قدراتنا و إمكانياتنا
يعني الحياة أولويات أنا بدي أأقلم حالي و متطلباتي حسب قدراتي و مستواي الإجتماعي و الإقتصادي

هي مشكلة كبيرة بمجتمعنا الغيرة و التقليد الأعمى يلي بفوق القدرات والامكانيات، بالنسبه لمجتمع متل المجتمع الأردني امكانيات الافراد فيه محدوده والرواتب بالقطاره يدوب بتجيب الاساسيات و ب5 الشهر الراتب بكون طاير ،صعب كتير نقدر نحقق كل متطلبات الحياة لكن نتيجة عدم الوعي وعدم القدرة على تمييز و تحديد الاولويات ضعنا بين الكماليات والأولويات فصرنا نشوف كل شي أولوي و أساسي بحياتنا
من حق هالأسرة تعيش حياتها و تطلع و تنبسط وتزور هيك اماكن و من حق هالأب يجيب لأطفاله يلي بطلبوه بدون ما يأثر هالشي على ميزانيته المحدوده ومن حق الزوجه تعيش حياتها وتكون متل صحباتها وخواتها وجارتها
لكن هالوضع ما بنفع عندنا بالأردن لأنه الامكانيات الاقتصادية لأغلب الشعب محدوده ومافي قناعه انه اكتفي بيلي عندي و ما اطلع يلي بايد غيري هالشي مصيبه كبيره وصعب نتغلب عليها ازا ماكن في قناعه

بشكرك محمد على هالقضيه المهمة ومابعرف انا بالعاده بنتبه لهيك غيره بس اول مره بتجي ببالي انه الامكانيات محدوده وصعب تحقيقها بهيك موقف انساني


قضية مهمة جداً

[shams spring]

يا الله يا محمد شو انه موقف صعب
الله يجزيك الف خير يا رب ... هاد موقف انساني رائع منك ... وانا بتشكرك عليه من كل قلبي


يعني اذا انت مش قادر تنسى الموقف ..كيف الرجال نفسه ..!!!
انا متأكدة 100% انه حزت في باله كتيـــر وانه بعمروا ما رح ينسى هالموقف ..!!

الكماليات اشي مهم لكن مش اشي اساسي .. يعني اعتقد احنا كمجتمع اردني معروف وضع الشعب كيف وحافظينو عن غيب
لازم يكون فيه ترتيب وتنظيم بحياتنا ... رتب اولوياتك ...اذا شفت وضعك بيسمع مش غلط بالعكس ترويح عن نفسك من ظغط الحياة ... يعني الكماليات هي ترويح عن النفس ...طيب ما دامها هيك فش داعي اضغط حالي مشان اطلع طلعة معينه ...وبهيك لا بروح عن نفسي ولا اشي بالعكس بكون زدت همومي ... وزدت ظغوطي ..!!

والله يا محمد ... بمجتمعنا الاردني فيه هيك واكتر بس هاد كلو زاد عن حدو في الاونة الاخيرة
يعني بعرف ناس ...عمرو بيت بجنن .. واشترو اثاث جديد وما خلو شي ناقص الا وجابوا ... يعني توقعت وضعهم ناري... واتفاجئت بعد فترة ,,,,انهم غرقانين بالديون .. وانه حد بيقربلي صرلوا شي 5 سنين بترجاهم يسدو فيه وهم بماطلو ...على كلمة ..معيش معيش ...!!! والله اعجب من هيك ناس كيف تفكيرهم ..!! صدقا هم متل الي كذبوا على حالهم وعاشو بمستوى اكبر منهم ... بالتالي هم هلا مش مرتاحين لا هم بمستواهم ولا بالمستوى يلي حبو يكونو فيه
وهاد الواقع...!!

هل الكماليات بالنسبة لك شيء مهم ؟؟

ما رح احكي حكي مثالي ...خلينا بالواقع ...كل انسان بحب يطلع ويرفه عن حاله وانا اول وحدة وما بنكر انه بعشق الطلعات والاشياء هاي ....لكن ضمن وضعي ...في متل بحكي "ع قد لحافك مد رجليك "...

انا ما بنكر انه الكماليات بالنسبة الي شيء مهم
يمكن هاي طبيعة في الانسان ما بيقدر يغيرها
لكن لا يمكن انه احط حالي بموقف محرج مشان الكماليات
الواحد لما بدو يطلع بطلع مشان يرفه عن حاله مش مشان اتشبه بغيري..!!
والاماكن يلي بتعجب غيري احتمال ما تعجبني ...!!

يعني بشكل اوضح انا باقلم كمالياتي مع وضعي ...مش بأقلم وضعي مع الكماليات ...!!

مشكووووووور محمد نقاشات هامة ... وفعلا في صلب الواقع
تقبل مروري

[محمد العزام]

بتشكرك دموع
شمس كمان بتشكرك
يمكن الاعضاء لما يدخلوا بحسوا مواضيعي من المريخ جايبها
يا اعضاء ياكرام هالمواضيع من صلب حياتنا اذا ماناقشنا بحياتنا وامورنا لكان كيف بدنا نحل مشاكلنا ونتعاون على اصلاح مجتمع اصبحت السمة العامة بانه فاسد
طروحات ليست لحاجة للتفكير وتحك راسك لالها لحتى تعرف شو تجاوب ...احنا مش بقاعة امتحان ولا انت تلميذ وانا مدرس كل ما هنالك موضوع بنعيشه بحياتنا حتى يمكن نفسنا بنعيشه لازم تكون عندك القدرة على المناقشة والا رح تتعب بحياتك كثير مش غلط تدخل وتشارك لحتى تفيد وتستفيد بالنهاية






الرجاء التكرم والدخول للمناقشة

[محمد العزام]

اليوم رح نطرح قضية جديدة يمكن كطلاب بجامعتنا ومعاهدنا بنعاني منها ... ويمكن بينا وبين اصدقاءنا بنتكلم فيها ويمكن حتى نسمعها باخبارنا وبصحفنا


السائح الاجنبي وخاصة من اهل الخليج
لماذا تقدم لهم المعاملة الخاصة عن بقية الشعب الاردني
ولما الحكومات تهتم بالطالب الاجنبي اكثر من الطلاب المحليين
ولماذا يسمح للطالب الاجنبي اخذ مقعد بجامعة حكومية او خاصة على الرغم من العلامات المتدنية التي يحصل عليها في دولته
هل هو توجه لزيادة الاستثمار ام كما نسميه استثمار للاجنبي واستحمار للمواطن الاصلي

هل انت مع توجه الحكومة لاعطاء تلك الميزات التي يحصل عليها هذا الاجنبي
هل بالفعل حقق هذا الاجنبي النمو والطفرة في اقتصادنا كما نتوقع



ننظر المزيد من ارائكم

[shams spring]

بتشكرك دموع
شمس كمان بتشكرك
يمكن الاعضاء لما يدخلوا بحسوا مواضيعي من المريخ جايبها
يا اعضاء ياكرام هالمواضيع من صلب حياتنا اذا ماناقشنا بحياتنا وامورنا لكان كيف بدنا نحل مشاكلنا ونتعاون على اصلاح مجتمع اصبحت السمة العامة بانه فاسد
طروحات ليست لحاجة للتفكير وتحك راسك لالها لحتى تعرف شو تجاوب ...احنا مش بقاعة امتحان ولا انت تلميذ وانا مدرس كل ما هنالك موضوع بنعيشه بحياتنا حتى يمكن نفسنا بنعيشه لازم تكون عندك القدرة على المناقشة والا رح تتعب بحياتك كثير مش غلط تدخل وتشارك لحتى تفيد وتستفيد بالنهاية






الرجاء التكرم والدخول للمناقشة


مممممم والله مشكلة يا محمد
جد ليش ما حد بشارك
ول معقول ما حد تعرض لمشكلة من هالمشاكل يلي عرضناها للنقاش
مستحيل ....احنا بمجتمع واحد والي بصير ع واحد بصير ع الكل
والله شكلو رح نعمل الموضوع اجباري لحتى نسمع اراء الكل

[دموع الغصون]

هلا انا رح وضح نقطة
رد شو ماكان رأيك مو ضروري تنمق حتى لو رأي مخالف شايفه مو غلط بالنهاية كل انسان و تفكيره و رأيه
هلا يمكن يكون كمان رأيك متوافق مع رأي عضو شارك وحكى رأيه معلش ادخل و احكي انا من رأي كزا من الأعضاء
خلينا شوي نكسر قيود الخجل والبرستيج و الخوف
مافي حد اجى متعلم او كاسر الحاجز للنقاش
يعني حلو شوي نطلع برى شخصيتنا لنتعرف مع الباقي على الزوايا المخفيه بعقولنا

هلا القضية بتعمنا كلنا كونه عم نحكي عن وسيلة تواصلنا ولا في حد بدخل للمنتدى بدون نت وما بستخدمه ؟؟ يعني الموضوع من صلب اجتماعنا وتواجدنا

[shams spring]

استثمار للاجنبي واستحمار للمواطن الاصلي


اعتقد هيه هيك بالزبط... جبتها بالعقل ع فكرة
وقبل ما ابدي رأيي بدي احكيلكم هالشغلة يلي صارت من اسبوع واحد وبالتحديد يوم السبت الماضي ...طبعا السبت الماضي كل الاردن طلعت رحلات وهاد وضع طبيعي
ومتل ما اتعودنا لازم يصير "هوشه " وهاد وضع طبيعي
وبتيجي الشرطة وبتهدي الاوضاع وهاد امر طبيعي
لكن الي مش طبيعي انه سيارة فيها سواح اجانب وبالتحديد من الخليج وبالتحديد من السعودية ومعهم واحد من معان بتلاحق ورا بنت وجننوها اخر شي حكت للشرطة
اجت الشرطة لتتفاهم مهم نزلو "بالكلاشن" وعجبو قد ما عملو ولا خلو وضربو الشرطة والشرطة صارت تترجى فيهم وبالاخر كلنا بنتوقع انه الشرطة اسنجدت بفرق اخرى ولكن
الى بخلي الواحد ع "صفنته" انه تركوهم وكملو رحلتهم وكأن شيء لم يكن


مش عارفة شو هالدم الي عليهم ..!!
ولا لانه سياح تركوهم؟؟ يا ترى لو اردنين شو بعملو فيهم ؟؟
يا ترى هم تصرفو هيك من حالهم ولا فيه اوامر عليا بذلك ؟؟

بصراحة ~~محمد ~~ الموضوع "قاهرني " صرله فترة يمكن انا خرجت عن نطاق الجامعة شوي لكنه في صلب الموضوع
الطالب الاجنبي ~~ وعذرا ليس من باب التعميم ~~ ليس بمستوى الطالب الاردني
انا كتير كنت احضر محاضرات ماجستير في اليرموك وكانو الطلاب الاجانب "لا يفقهون شيئا " انا الي ما الي علاقة بالتخصص افهم واتفاعل وهم ولا حد هون ... واذا ساله الدكتور شي
ما بعرف ... وبالاخر بسأل رسبو "لاني شيء طبيعي " بحكولي لا



طيب سألنا انه ليش ؟؟
بحكيلك هدول دافعين مبلغ وقدرة والاردن بدها تستفيد منهم وما بدها تنفرهم ...يعني ما بنقدر نرسبهم واذا رسبناهم بصير علينا مسآءله على الاغلب

مممم اما الاردني اذا كان لا يفقه شيء بصيرو يحكولك " الذمة الضمير المباديء لا يستحق " وبكرجولك ياهم مرة وحدة



هل انت مع توجه الحكومة لاعطاء تلك الميزات التي يحصل عليها هذا الاجنبي


كنت مع وهلا مش مع ... كنت أحكي خليهم لانهم بفيدو الاردن وهم استئمار النا
لكن لا استفدنا ولا شي بالعكس الضرر اكبر النا احنا كطلاب
لانهم كمعاملة يعاملو افضل
بينحسبلهم الف حساب
ومن غير ما يتعبو كل شي موفرلهم
وناجحين ناجحين سواء درسو او لا




هل بالفعل حقق هذا الاجنبي النمو والطفرة في اقتصادنا كما نتوقع
لا لم يحقق لانه بصراحة المال يلي بناخدو منهم ما بيلحق يدخل بالاقتصاد اصلا
سمعت انه وهو في طريق الدخول الى الاقتصاد المحلي يتم اقتطاع جزء منه عند كل مطب يصادفه الى ان يصل الهدف المرجو ليتفاجيء "س" انه لا يستحق الدخول الى عجلة الاقتصاد بقوله " مش محرز " وسلامتك يا شعب

مشكووووور محمد على هالنقاش ... "فشة خلق" بصراحة

[دموع الغصون]

السائح الاجنبي وخاصة من اهل الخليج
لماذا تقدم لهم المعاملة الخاصة عن بقية الشعب الاردني
الأردن معروف بأنه بلد الكرم و الضيافة و النبل و الأخلاق .. هالموضوع مو لأنه نحنا بنفضل الغريب على أهل بلدنا لكن هالشي بدمنا .. يعني لو اجاك ضيف لبيتك رح تقدمله عيونك ومابتتردد بهالشي فكيف ضيف على بلدك .. أكيد رح تكون معاملته غير هلا الخطأ أنه مافي عندنا عدل بالمعاملة وهالشي برجع للقوانين و لطبيعة الناس ..

ولما الحكومات تهتم بالطالب الاجنبي اكثر من الطلاب المحليين
هلا الطلاب يلي من برى البلد بكونو بمثابة سفراء لبلادهم متل ما نحنا عم بنطالب بحقوق طلبنا الأردنيين يلي بدرسو برى من حقهم يلاقو نفس الحقوق و نعطي نفس الواجبات .. بالنهاية هالشي بكون نتيجة بعث رسمية واتفاقيات ومعاهدات ما فينا نخل فيها أو نتجاهل أي بند منها أولاً لأنه رح نعكس صورة سلبية تانياً المفروض هالاهتمام يكون لجميع الطلبة بدون تمييز كمان اللوم والخطأ مو على الحكومه الخطأ على المدرسين و الطلبة و المسؤولين المحيطين لهاد المجتمع لو كان في عدل ومساواه ماكان ظهر هالشي بشكل بارز متل ما عم نلاحظه


ولماذا يسمح للطالب الاجنبي اخذ مقعد بجامعة حكومية او خاصة على الرغم من العلامات المتدنية التي يحصل عليها في دولته
هالموضوع في اتفاقيات دولية بالنهاية همه يلي رح يتظررو مو نحنا هلا طلابنا الأردنين يلي جايب بالاردن 70% بنزل لدولة مابعرف من وين هيه بجي معه شهادة الطب همه شو ضر عليهم اقتصادهم انتعش استفادو من حيث السياسة والاقتصاد والعلاقات الدولية والاتفاقيات ويلي تضرر مجتمعنا .. نفس الشي نقيسه عليهم .. هلا أكيد مابتكون القوانين هيك لمجرد انه من برى البلد بدرس اي تخصص في معايير ومقاييس بتبعوها مو الكل بقبلوه حسب نظام التعليم الخاص بالدولة يلي جاي منها الطالب على سبيل المثال هلا طلاب التوجيهي الأردنين حاملي الشهادة السعودية بنزلو من معدلهم عند دخول الجامعات الأردنية هي في معاملة بنظر البعض ممكن تكون سلبية لكنها ايجابية حقاً .. فمتل ما في هيك في هيك مو كله تمييز ايجابي واهتمام ايجابي .. انا مع هالتميز و مع هالاهتمام

هل هو توجه لزيادة الاستثمار ام كما نسميه استثمار للاجنبي واستحمار للمواطن الاصلي
أرفض مسمى استحمار للمواطن الأصلي
كرامة الأنسان خط أحمر سواء كان مواطن أو ضيف مهما كان يبقى له حقوق كذلك عليه واجبات
من حق الدولة أن تنشط اقتصادها وعلاقتها الخارجية لكن ليس على حساب الوطن والمواطن هناك طيش في تنفيذ بعض الاتفاقيات الدولية في مجال الاستثمار هناك تمييز هناك تميزات تعطى للمستثمر الخارجي ومراعاة خاصة تيسر له أموره يحرم منها المواطن الأردني هنا الخطأ ليس على القانون و إنما على المسؤولين بالدرجة الأولى


هل انت مع توجه الحكومة لاعطاء تلك الميزات التي يحصل عليها هذا الاجنبي
هل بالفعل حقق هذا الاجنبي النمو والطفرة في اقتصادنا كما نتوقع
بالتأكيد حقق هذا الاستثمار نمو في اقتصادنا لكنا لا ندرك هذا النمو نظراً للوضع الراهن للمنطقة وسوء الأمور السياسة من ناحية قضايا قد تفتح ملفاتها عما قريب و قد تدفن بعض الملفات بين الدفن والاحياء يبقى المواطن الأردني يتأمل وينتظر أن يسدل الستار عن ايجابيات و سلبيات هذا الاهتمام وما مدى التزام الجهات المعنية و تطبيقهم للقوانين سواء كانت مع المواطن أو مع الضيوف


يبقى أن نؤكد بأن هناك الكثير من الحقوق مهضومة للمواطن الأردني هذا لا يعني أن نعبر عنها بمقارنة وضعنا بوضع غيرنا لتكن نظرتنا إيجابية بتحسين الحال والوضع بإعتمادنا على مفاهيم و أسس صحيحة عقلانية واقعية قابلة للقياس ومحددة


راق لي كثيراً طرح هذا الموضوع
أنتظر المزيد بشوق

[محمد العزام]

يمكن يكون بعض من كلامك صحيح دموع ولكن هناك شيء غير متفق عليه
ايا كان نوع الضيف الذي سوف استقبله في بيتي ساقدم له الضيافة ولكن بشرط احترام ضيافتي له
لنكون واقععين .... الكير من المستثمرين اللي دخلوا هالبلد ...تحت مسمى واحد الافادة والاستفادة بالفعل رفعوا من اقتصاد هالبلد اللي لحد الان لو امتلكوه اشخاص شرفاء لكنا من الدول المتقدمة اقتصاديا ...ولكن المستمر كنمو اقتصاد وضع بعض الشروط اللي بتجهض مستقبل هاليلد ...امتلاك الارض اللي مالانهاية ولايستطيع اي اردني ان يستفيد منها ... انا قدمت كثير لشغل لشركات المؤسسين من خارج الاردن ... الشرط ان يكون ....... الجنسية

نعود لمسالة الطالب ...
الطلاب اللي بيدخلوا هالبلد من ضمن اتفافيات بين هالدول للتنويع الثقافي ومابعرف شو ...ولكن نفس الطالب الاجنبي بيدخل هالبلد بياخذ مجال طالب اردني ... ماتفكري دموع حكومتي بتنظر لهالطالب بانه كيس من هالمصاري وماشي كيف بدي استغله بقدمله كل شي لحتى يكون مرتاح واعرف استغله على حساب الطالب الاردني
ليش الطالب الخليجي مابحترم لادكتور ولاجامعة ولا محاضرات وبنهاية الفصل بالفعل ناجح زي ماذكرت دموع ...
احكيلك شو اللي بيعملوا الطالب الاجنبي وخاصة الخليجي بالاردن ...زاد من نسبة الفساد ببلدنا ... النوادي الليلة فقط زادت بالاردن من اجل الطالب الخليجي اللي ما احترم ضيافتي وماقدرها ...

يجب على الحكومة تعيد النظر ..مجرد مادخل طالب للاردن يعامل مثله مل اي طالب اردني لا والطالب الاردني لازم تحترمه اكثر من اي طالب لانه مهمة التعليم هي اكتشاف المواهب والاردني عندي مواهب هكس اي طالب اجنبي اللي مابيمتلك غير فلوسه وبيمشي فيها وبحاول التباهي فيها فقط لاغير

[محمد العزام]

اليوم رح نطرح قضية جديدة وهي قضية بتلامس هالواقع ومعاناة الواقع ....
يمكن هالقضية كانت وما زالت تقلق الكثيرين

اليوم رح نطرح قضية غلاء المهور


نلاحظ كثيرا عزوف اغلب فئات الشباب عن الزواج لاسباب كثيرة واهمها التكاليف الباهضة للزواج التي يتحملها ويعاني منها لانه الوحيد المسؤول عن تامين هذه المصاريف سواء من بيت او اثاث او تكاليف الخطبة والزواج وغيرها من الامور

هل مايحصل بمجتمعنا من ارتفاع لمهر الفتاة هو بالفعل لصالح تلك الفتاة ام لضدها

هل عزوف الشباب بهذه الحالة مبرر ام لا

هل فرض المهر الغالي هو بالعفل مقياس لقدر الفتاة

هل الاوضاع الاقتصادية والتي يعلمها الكل تساعد على فرض كل تلك التكاليف الباهضة

هل يجب ان يكون دائما راي الاباء هو المسيطر وراي الفتاة صاحبة العلاقة راي ثانوي لايضر ولاينفع بمثل هذه الامور

هل لاسم العشيرة دور فعال لرفع تلك المصاريف خاصة مانسمعه بايامنا (والله هالبنت من هالعشيرة الفلانية لازم نعطيها ونقدملها بحجم عشرتها وسمعتها )



الكثير من الاسئلة التي تطرح واتمنى المشاركة وانتظار الاراء من كل الاعضاء

[تحية عسكريه]

غلاء المهور موضوع مثير يا صديقي محمد بصراحة المهور وغلائها بكون السبب الاول والاخير ن طرف عائلة العروس

ما بعرف شو السبب معقول يكون كل ما كان مهر بنتهم عالي بكون وضعهم وتباهيهم بالعريس اكثر ....................

[دموع الغصون]

موضوع مهم جداً وقضية رائعة من صلب الواقع
هلا بنظرت المجتمع المهر شي اساسي لرفع قدر البنت و قدر اهلها وعشيرتها بما يتناسب مع الفخر الاجتماعي والكماليات
وهو شي ضروري لتباهي و اضهار الذات اجتماعياً
لكن برأيي الشخصيي المفروض انت عاطي بنتك لرجال وثقه ومأمنه على بنتك فطبيعي ما تفرق معك كل الأمور الماديه من مهر وغيره اما الأثاث أكيد مارح تتشرط عليه شو يأثث لبيته لأنه هو رح يسكنها مو انت كأبو العروس أو أهلها
من حق الفتاة تشارك زوجها في كل شي قبل الزواج لانه رح يعيشو حياة مشتركة مستقبلاً فلازم يبدأو كل الخطوات مع بعضهم
غلاء المهور وغيره هو برستيج اجتماعي فينا نتغلب عليه بالمصداقية واتباع سنة الرسول صلّ الله عليه وسلم

[صديقه بنت الشديفات]

مساء الخير محمد

بالنسبه لـ غلاء المهور قضيه كبيره بالوطن العربي ككل
لكن صدقاً هالشيء مو دايماً من صالح الفتاه احيانا بكون ضدها لانه واحد وراء واحد والمهر غالي ماحدا بعدين يتقدملها
يعني خللها يا ابوها

مو دايما المهر مقياس للفتاه احيانا ابوها بغلي المهر لحتى تضل عنده يعني بالعقل

اما بالنسبه للعائلات يمكن البعض لسا عنده هاي الافكار ومتمسك فيها كن بنظري شو الفائده بغلي المهر لاني من العائله الفلانيه..


::

[&روان&]

موضوع رائع وقيم وهو حديث العصر
وهو من اهم الاسباب التي تؤدي العزوف عن الزواج عند الشباب
الفتاة التي مهرها قليل هي الاكثر بركة هذا ما وردة في السنة الكريمة
بس نظرة الناس هاي الايام الاهل الي بيطلبوا مهر قليل بيفكرا انهم بدهم يخلصوا من بنتهم
وبتضل معيار الها ؟؟!!!!!!!!!!!!
ما بعرف هادا رأئي

[دموع الغصون]

معلش محمد بس تنهي القضية من بعد ازنك في قضية عندي حابه اسمع رأيكو فيها

[محمد العزام]

اقترحيها دموع ...ولايهمك ...كلنا اذان صاغية

[دموع الغصون]

شكراً كتير محمد

قضية لاحظتها بمجتمعنا بشكل كبير مو محضورة بمنطقة معينة بالعكس عندي كم نموذج من القرى والبادية و المدينة من الشمال والوسط والجنوب
- لماذا تلجأ الفتاة إلى التعليم والدراسة بعد فشلها في الحياة الزوجية ، على الرغم من تفضيلها للزواج و تكوين أسرة بالوقت الذي يجب أن تهتم وتبني مستقبلها بمجال اهتمامها
- لماذا تلجأ الفتاة إلى الدراسة بعد طلاقها بفترة قصيرة .. ولماذا تترك الفتاة الدراسة بعد ارتباطها بفترة قصيرة ؟؟
- هل تختلف الأولويات عند الفتاة .. أم نوع من اثبات الذات بعد فشل العلاقة الزوجية ؟؟
- لماذا عند حدوث خلاف بين الزوج والزوجة وتبدأ الفوارق بينهما بالوضوح تلجأ الزوجة إلى اكمال تعليمها و دراسات عليا .. ما هو الهدف من ذلك ؟
ياريت أسمع رأيكو من المنظور الخاص ومن النماذج الموجودة بمجتمعه
على فكرة هالموضوع منتشر بشكل رهيب باخر كم سنه
بتكون الوحده عندها اربع ولاد بترجع للمدرسه هي وولادها أو ابنها توجيهي وهي سنفورة كنو هلا تزكرت أهمية التعليم و لما اجاها العريس نسيت اهلها والدراسه لتمسك فيه
برأيكو اللوم والخطأ هنا على الأهل على المجتمع على الفتاة على الزوج ؟؟

[محمد العزام]

قضية رائعة جدا بتلامس جوانب مختلفة من المجتمع مش فقط من ناحية الدراسة للفتاة ...جوانب كثير بتغطيها القضية

هلا رح اشرحها بشكل عادي ..بدون الاجوبة على اسئلتك

هلا ندخل لموضوع الزواج المبكر للبنت ..من ناحية اسبابه ومن ناحية الجهة المسؤولة عن هالشي ...المجتمع ام الاهل ام الفتاه نفسها ... هالموضوع بيدخل لاكثر من تعليق ...يمكن يكون السبب الرئيسي الفقر اللي بتكون عايشيته البنت بيدفعها للزواج بغض النظر عن التفكير بانها تتحمل مسؤولية الزواج او لا ...يمكن بنظرة ثانية انها قادرة تتحمل هالمسؤولية ومقنعه حالها بهالشي بس لما تستقر تكتشف عكس هيك ...ويمكن ضغط الاهل عليها ...اذا نتوصل انو الكل مسؤول عن هالشي ...طبعا بشكل عام ونظرة عامة

لمسالة الدراسة ...بالفعل انا هيك بلاحظ بهالمجتمع انو الزواج صار يفضل عن الدراسة خاصة للبنت ..انها مستعدة تستغني عن الدراسة في سبيل انها تتزج ..يمكن السبب او الاسباب تكمن نفس الاسباب اللي ذكرتها قبل شوي ..الفقر والاقناع وغيره من ذلك ويمكن ينضاف سبب جديد انو الغيرة عند هالبنت والله مثلا ليش صاحبيتي اتزوجت وانا لساتني ...


هلا ندخل لموضوع ثاني ...الزواج بكون من جهة الرجل بانه مش متعلم وزوجته متعلمة او العكس ...بعد حدوث الزواج رح يكون هناك اكيد فوارق بالتفكير ..السبب اللي بادي لاي طرف اللي بكون مش متعلم لممارسة التعليم لسد النقص بينه وبين الطرف الاني ...

حصل الزواج وماحصل التفاهم بعد هيك وكان الطلاق ...البنت رح تحسبها بنفسها انو ماحد رح يطلع علي وخاصة اني مطلقة ومش متعلمة كمان عشان هيك تضطر انها تعيد بناء حالها وترجع للدراسة لحتى بوجهة نظرها انو تعيش قصة زواج مرة ثانية ...بعد ما اكتشفت غلطتها انها اتزوجت شخص بيزيد عنها بالفارق التعليمي او انها اتزوجت وهي صغيرة وماقدرت تحمل مسؤوليلة بيت واسرة وغيره وغيره


المسؤول عن هالشي اتوقع جميع الجهات اللي ذكرتيها دموع


بانتظار اراء الاعضاء

ومشكورة دموع على طرح هالقضية

[دموع الغصون]

رأي جميل جداً هلا الزواج المبكر بنظري هو أكبر غلط بمجتمعنا مافي مسؤولية لا من الأهل ولا الفتاة ولا الشب
بس بالنسبه لموضوع لجوء الفتاة للدراسة بعد فشلها بالزواج
أنا شفت كتير نماذج و سألتهم عن هدفهم كان أكبر طموح عندهم و أكبر رسالة توصل لطليقها انها هي افضل منه بانها كملت دراستها وقادره على العيش بدونه

آخر همهم التعليم او بناء مستقبل جديد بالعكس كل هدفهم يتميزو على الماضي الصعب يلي عاشوه
انا ما بعمم بس عم بحكي عن نماذج شفتها وللأسف نصدمت بطريقة تفكيرهم
طبعاً أغلبهم عندهم اطفال بالمدارس و عم بفكرو هالتفكير جد شي يخدش كبرياء المجتمع

[محمد العزام]

نترك هاليوم كمجال للاعضاء للنقاش بالموضوع اللي طرحته دموع


بعد هيك رح نطرح قضية جديدة


تفاعلكم يا اعضاء الحصن

بدنا مشاركتكم

[محمد العزام]

رح تكون قضيتنا اليوم قريبة من السياسة ....وبعرف انو هالشي بعبع بالنسبة لاغلب الاعضاء ....بس لانه هالشي انا كنظرتي الشخصية حاس انو احنا كاردنيين بلشنا نتاثر فيه

قبل ايام معدودة شاهت احصائية للاجئين السوريين بالاردن بلغ العدد تقريبا 12 الف سوري داخل الاردن ....منهم الملاكين او الاقطاعيين زي مابنحكي ومنهم الطبقة المعدومة
ويمكن لاحظنا انتشارهم في جميع مناطق المملكة وشخصيا لاحظت هالشي لانو صار اغلب اللي بتعامل معاهم اخوانا السوريين


حاب اسمع راي الاعضاء بهالموضوع من جميع النواحي

هل نعتبر ذلك من واجب الاردن وكما تعودنا اكرام الضيف

ام هل نعتبر ذلك اثر على نفس المواطن الاردني لو علمنا بانه اصبح ياخذ حق العامل الاردني في الوظائف

هل نعتبر وجودهم مجرد فتره وستزول عندما تتنهي الاوضاع الراهنه في سوريا


والاهم من ذلك ....هل حكوماتنا قبضت الثمن مقابل ايواءهم داخل الحدود الاردنية وعوضت ذلك على حساب المواطن الاردني من خلال مايحصل حاليا من ازدياد في حجم الديون الاردنية للخارج







بنتظر الاراء والتعليقات

[&روان&]

شكرا محمد على طرحك هاي القضية هي فعلا هذه القضية يجب من الكل التحدث حول هذه القضية لما لها اثر كبير على وطننا الاردن
صح احنا معروف عنا بلد مضياف وكريم لكن ليس لهذه الدرجة فدخول اللاجئين السوريين الى البلد يؤثر عليها من عدة جوانب واهمها الاقتصادية والاجتماعية
وايضا نحن في الاردن نعاني من البطالة وقلة الحيلة وعدم توفر العمل وبالتالي رح تضعف فرصة تحسن وضعنا الاقتصادي بسبب اللاجئين السورين فهم بحاجة الى مسكن وملبس وعمل
وايضا رح تضعف فرصة العمل لدى الشباب الاردني
وغير ذلك كله رح تنتشر نسبة السرقات والجريمة وووووو ...........الخ
واتمنى ان يكون وجودهم مجردة فترة وتتنتهي اتمنى ذلك
اما بالنسبة لحكومة الله اعلم
بس انا لاحظت شي انو اوضاعنا الاقتصادية بدأت بتدهور عند دخول اللاجئين اليها
والله اعلم

[دموع الغصون]

كالعادة الأردن بلد للجميع فهو كالأب الحاني يستضيف كل من دق بابه و يقدم له الضيافة العربية الأصيلة
لكن كما لهم حقوق عليهم واجبات و يجب ان يخضعو لنظام و قواعد و شروط ويجب على الحكومة ان تضع سياسة واضحة لتعامل مع مثل هذه الظروف و هذا العدد الكبير من الضيوف العرب سواء كانو فلسطينين أو عراقيين او سوريين
الأردن للأردنين فقط يجب ان تتخذ سياسة اكثر حزما مع التعامل مع ضيوف الوطن من شتى المنابت والأصول لضمان حقوقنا وحقوق الوطن و ضمان حقوقهم وحقوق أوطانهم من أهم حقوقهم حق العودة من وأهم حقوقنا ان نتمتع بكافة حقوقنا كموانين أردنيين

أكيد وجود اللاجئين يؤثراً سلباً على المواطن الأردني البسيط و ايجابياً على اصحاب رؤوس الأموال و قد يساعد بنسبه بسيطة لا تخدم الا فئه محصورة من المجتمع على زيادة الاستثمارات لكن هالنقطة مارح تخدم البلد ولا تعتبر ايجابية لانها بشكل مؤقت للبحث عن بديل اخر او العودة إلى أوطانهم

لن تكون لفتره بل ستستمر كما استمر حال غيرهم من الضيوف العرب وسيزيد الوضع سوء إذا لم توضع قوانين و خطط عمل لمعالجة الموقف وتصحيح ما حصل من اخطاء منذ عشرات السنوات

[shams spring]

هل نعتبر ذلك من واجب الاردن وكما تعودنا اكرام الضيف

ام هل نعتبر ذلك اثر على نفس المواطن الاردني لو علمنا بانه اصبح ياخذ حق العامل الاردني في الوظائف

هل نعتبر وجودهم مجرد فتره وستزول عندما تتنهي الاوضاع الراهنه في سوريا


والاهم من ذلك ....هل حكوماتنا قبضت الثمن مقابل ايواءهم داخل الحدود الاردنية وعوضت ذلك على حساب المواطن الاردني من خلال مايحصل حاليا من ازدياد في حجم الديون الاردنية للخارج

مسا الخير للجميع
اشتقت ل هالزاوية بشكل عميق
ويعتريني الاسف على المواضيع السابقة التي لم يتاح لي فرصة بادلاء رأيي فيها
وبتشكرك محمد على طرح هاد الموضوع الحساس


وضعهم ببكي والوطن عم بحارب الوطن ... وابناء الجنسية الواحدة عم بقاتلو ابناء جنسيتهم ... احداث تقشعر لها الابدان ... وشيء طبيعي من وطنا الاردن يكون بمثاب الاب الحاني لهم في هذه الفترة العصيبة

بالنسبة الي اكيد بعتبرة من واجب الاردن الذي يعتبر الجار الشقيق لسوريا فيجب علينا ان نستقبلهم بحضن دافيء بالوقت الذي تخلى عنهم حكامهم ...

ولكن بحذر
لانه دخولهم الى الاردن سبب ازمة كبيرة ما حد بينكرها ... يعني على مستوى الاعمال البسيطة والحرفية ...نجد اليوم ان اغلبهم سوريون ...!!!
ع مستوى استئجار البيوت ..المؤجر يفضل المواطن السوري لانه الحكومة هي من تدفع الايجار الاكبر

لو كان في تخطيط لو في تنظيم ما بصير هيك لكن للاسف حاسة كل شي بصير ع التساهيل
وما في عنا خطة محكمة لنحتويهم بحذر .. لان المواطن الاردني ما لازم يشعر بهالازمة الي نحنا فيها الان ...!!

مش عارفة ...جد هالقضية لحد هلأ محيرتني وبكل صدق انا كتير متأثرة بهالاحداث وكتير متعبني الوضع وماخد حيز كبير بحياتي ... لدرجة انه ما فكرت شو ممكن يسببو ازمة لالنا او شي تاني ...انا هلا اكبر همي انه يخلصو من هالعذاب ... ومن هالمآسي ...لانه يلي بصير في سوريا ازمة اخلاق بكل ما تحمله الكلمة من معنى ....!!

مشكوووور محمد

[محمد العزام]

بتشكر كل واحد علق على الموضوع ولي عودة على تعليقاتكم اول باول ولكن قبل هذا

ساطرح عليكم سؤالا ....بمثابة المكمل للموضوع وبعدها ساناقش تعليلقاتكم


من يقرا التاريخ ويتمعن به جيدا

هل تلاحظون بان سوريا كانت العدو الاول للاردن لقيادتها ولشعبها ؟؟؟؟؟؟؟؟

[دموع الغصون]

معلش محمد من بعد ازنك رح رد على سؤالك بسؤال
لو لا سمح الله ولا قدر و ان شاء الله مارح يصير هيك و الله يحمي الأردن وباقي الدول
بس لو نقلبت الآيه و الشعب الأردني كان محتاج مارح نحكي للجوء لكن لمساعدة الشعوب و الحكومات الاخرى لدول العربية المجاوره والبعيده جغرافياً رح نلاقي معاملة و مساعدة واستقبال و كرم متل كرم حكومتنا وشعبنا أكيد لا
رح نلاقي هيك استقبال من العراق وفلسطين و السعودية و لبنان و مصر اكيد لا
يلي بيقرأ التاريخ منيح رح يلاقي الأردن مستهدف من جميع الدول والسياسات الخارجية العربية و الأجنبية
هاد مابنفي نحنا بنضل امه عربية و اسلاميه واخوه وكل واحد اله حقه
والحمدلله عندنا هيك قياده حكيمة هدفها الأساسي هاد الوطن و شعبه

[&روان&]

سؤالك شوي محير كيف سورية كاينة عدوة النا
و احنا هلأ بنستضيف اللجئين عنا

[محمد العزام]

دموع انا هذا بقصده وهذا اللي كنت بدي اسمعه منك او من غيرك من الاعضاء

انا بحكيها لو الاردن لاسمح الله صار فيها هيك اكيد سوريا مارح تستقلل مارح يكون فيه عند مثل هيك اخلاق ومثل هيك كرم ومثل هيك معاملة
انا مش ضد انو نستقبل هاللاجئين او نعاملهم بهالمعاملة ...لا بالعكس بستقبلهم وبساعدهم بس ضمن قواعد اساسية وهي كالتالي
اذا انا نفس شعبي شبعان ونفس الشعب بيقدر يقدم مساعدات للاجئين معناه اهلا وسهلا فيه
اذا حكومتي قادرة تفصل بين لاجئ ومواطن اردني بساعدهم
ااذا نفسهم الاجئين بيحترموا مبدا الضيافة بحترمهم




اختلطلت الامور كثيربالنسبة للسوريين باالاردن انا والله كمواطن اردني مابرضى على حالي نصيبي روحي من وطني لسوري والكل زي هيك تحت مبدا الاخوة والمساعدة وفوق هيك زي مابحكيها دايما طخ للعروبة

انا شو ذنبي كمواطن اردني اغلب الصناعات والشغل صار للاجئ وابن البلد قاعد وحتى منهم بيطردوهم وبجيب لاجئ يشغلوا لانه راتبه اقل شوي وبرضى فيه

انا كمواطن اردني لشو اتحمل العجز عندي يوصل ل20 مليار ولسى الخير لقدام من ورا لاجئ وهو اصلا اللاجئ ما احترمني ولارح يحترمني


سيبونا من العروبة الزايدة واحكوا بتمعن وبتفكير منطقي للي بصير حوالينا لانو نفسها العروبة اللي وصلتنا لهالمرحلة

[محمد العزام]

روان اقراي التاريخ وشوفي شو هي حقائق سوريا عن الاردن
ولفترة مش بعيدة مظاهرات في سوريا بتطالب تنضم الاردن لالهم

[دموع الغصون]

محمد نحكي بمنطق و لو ترجع لردي الأول بتفهم فكرتي منيح
المنطق بحكي متل ما استقبلنا ضيوف من دول اخرى واجبنا نستقبل من سوريا بس ما تطول فترة الاستضافه مو بس السوريين اخدو حقوقنا كأردنين
الفلسطينين و العراقيين و السورين واي عماله وافده عم تاخد حقوقنا سواء كانو تحت مسمى لاجئين او عماله
وين الغلط لو ضلينا نتغنى بالعروبه لكن في اهم من العروبه الوطنية
وطني أولاً وبعد هيك بتجي العروبه
الخطأ الكبير على الحكومة دورها تنسق بين المخيمات و بين المواطنين
حكومتنا عامله متل حاتم الطائي عم تاخد اللقمه من قدام تم المواطنين و بتعطيها للضيوف
العروبه مهم لكن الأهم الوطنية
سبق وحكيت الأردن للأردنين فقط لا غير لكن بنرحب بكل الأخوه العرب وإن شاء الله بعودو لأوطانهم بأمان وسلام وهاد حق شرعي لالهم

[ابو المكارم]

خلينا نحكي بصراحة ولا ندفن روسنا بالرمل، الأردن بلد لا يملك الموارد الوطنية وهو كيان قام وما زال قائماً على معادلات القوة الدولية والظرف السياسي، ولولا الظرف السياسي لأعلن البنك الدولي إفلاسه، ولا تفكروا يا إخوان وأخوات إن الحكومة الأردنية ما بتستفيد من مخيمات اللاجئين من كل الدول المحيطة، لكن الحكومة ما بتعلن الدعم حتى يتم ترقيع الميزانية المهلهلة، الأردن بمفرده لا يستغني عن محيطه أو يستطيع العيش بدون هذا المحيط، الوطنية تقوم على بقعة جغرافية متكاملة اقتصادياً لا تعتمد في حياتها على المساعدات الخارجية وليست على بقعة جغرافية لا تملك لمواطنيها الحياة، والأردن لم يبنيه الأرنيون فقط بل ساهم في بنائه الأشقاء العرب وخاصة الفلسطينيين. لم يكن الشعب السوري في يوم من الأيام عدواً للشعب الأردني، ربما الحكومات والأنظمة الحاكمة على طرفي نقيض وهذا لا يمكن تعميمه كقاعدة والعمل على أساسه.

[دموع الغصون]

أبو المكارم بشكرك كتير على رايك بتصور الموضوع تمحور شوي وتشعب لكن رح رد على ردك
هلا الأردن مو متل ما حكيت بلد الأردن لا يملك الموارد الوطنية لو حكينا عن الموارد بشكل عام والوطنية بشكل خاص هو غني كتير و يفوق الكثير من الدول الغنيه اقتصاديا بموارده الوطنية وغيرها من الموارد ، أما الظروف السياسة و القوة الدولية كما ذكرت فهي بنظري من أكبر المعوقات لازدهار وتقدم الأردن ، الحكومة الأردنية أكيد بتستفيد لاكن للأسف عندنا ترهل في سياسة الحكومات المتعاقبة بغض النظر شو الأسباب .. بهذه الحالة الشعب يتحمل العبء الأكبر العبء الأول وجود لاجئين - ضيوف - العبء الثاني الحكومة تأخذ حق الشعب تحت مسميات سياسة هدامه
إن أكبر دول العالم لا تستطيع أن تقوم بمفردها فكيف تحصر هذه القاعده على بلد كالأردن محدود المصادر و الموارد أعتقد بأنه مقياسك هنا بحاجة إلى تصحيح فكل دول العالم تعتمد على المساعدات الخارجية بغض النظر عن نوع هذه المساعدات
أنا اوكد على أن الشعب السوري لم يكن يوماً ضد الشعب الأردني
ولكن لو عدنا قليلاً إلى عام 1970 لن اعود الى الكتب والتاريخ بل سأعود إلى أقوال المعاصرين لهذه الأحداث عندها سنجد ما قدموه لنا السوريين و البعض من الفلسطينين بتمنى نرجع نسمع ونقرأ عن احداث هذه السنة

اعتقد بأن الموضوع تمحور لذلك سنعود إلى الهدف الرئيسي و هو معرفة مدى تأثير وجود عدد كبير من اللاجئين - الصيوف - السوريين و العرب على الأردن كوطن ومواطن من وجهة نظر الأعضاء الشخصية

[shams spring]

يا جماعة ما حد بنكر انه اللاجئين السوريين سببولنا ازمة كبيرة ... لكن اذا احنا ما وقفنا معهم مين رح يوقف ...!!!
يعني لما تيجي مرة وولادها الزغار وزوجها انقتل وبدها بيت يؤويها ..نطردها متلا ...!! احنا العرب لبعض واكيد فينا نخوة وبدنا نساعدهم ...؟؟

بس لما نيجي نحكي عن الازمة مش احنا الشعب الي سببنا فيها ... الحق على الحكومة ...سياسة الدولة
انا لما اكون في البيت ويجوني ناس بدهم مساعدة ما بطلع بايدي ما اساعدهم ...

بس المسؤول عن الازمة يلي دخلهم من اول وهو اصلا مش حاطط خطة ولا سياسة محكمة لاحتواء هدول اللاجئين

وع فكرة هاي الشغلة بنعاني منها من زمان يعني مش اشي جديد متل ما حكت دموع احنا احتوينا الفلسطينين والعراقين وبكل مرة كان يصير عنا ازمة وبكل مرة كانو يتقاسمو نصيبنا في خيرات الدولة ...!!

الحكومة عملت شي لتحمي حقوقنا عملت شي لتحمينا من هالازمات .؟؟؟؟؟؟؟؟؟؟؟؟ اعتقد الجواب معروف عند الكل .................

بالنسبة لسؤالك محمد انا بعرف انه العلاقات السورية الاردنية كانت مهزوزة وهاد الشي معروف للكل ... واصلا علاقتنا كانت متل النار والبارود ... سياستنا مختلفة افكارنا مختلفة وانا هون بقصد الحكومات مش الشعب ....!!!

لو احنا صار فينا شي ...مين رح يساعدنا ...؟؟ هاد سؤال كتير مهم وبصراحه ما بقدر اجاوب عليه لانه وضع العرب بخزي ...ليش هو في حولينا دولة سليمة لحتى يساعدونا ...؟؟ كل دولة بدها مين يساعدها ..وكل دولة فيها الي مكفيها .... مش تا يساعدو حالهم بالاول ...؟؟؟؟

بكل صدق ..الضيوف السوريون سببولنا ازمة حقيقية الكل بشكي منها .. وانا وين ما اروح هي محور النقاش الاجتماعي ... الحق على مين الحق على الحكومة ... ما في ادارة ما في سياسة محكمة ..ماشيين على التساهييل ... !!!

[محمد العزام]

بتاسف اذا سبب النقاش نوع من الاختلاف ...ولكن اختلاف الاراء لايعني الحقد ولا الكراهية

بشكل عام ومختصر العروبة تغلبت على قوميتنا كاردنيين سواء كان من فعل الحكومات او من فعل الشعب نفسه
اوينا الكثير من اللاجئين وماحد بينكر هالشي ويمكن زي ما حكيتم الموضوع اتشعب لاكثر من جهة وبحب اوضح بعض النقاط

فعلا حكوماتنا مسكت وقبضت بدل وجود لاجئين وهالشي اثر على المواطن الاردني لانه الحكومات اصرت افعالها ولم تتعدل بيوم من الايام والشي الوحيد الذي نعزي فيه انفسنا بانه مقابل لدولتنا كادن وكمساحة جغرافية وموارد بشرية استنزفها الاجئين بالاردن وللاسف الشعب تحمل ذلك ......

بالنسبة لامتلاك الاردن للمواد فهو يملك الموارد والكل يعرف ذلك ولكن تقاعس الحكومات وعن جديتها في هذا الموضوع هو من اضاع هذه الموارد ويكفي الموارد البشرية في الادن تبقى هي اقوى موارديمتكلها الاردن ...




نعود للعلاقات الاردنية السورية ....لسواء تمثلت في الحكومات او الشعوب فهي سيئة على مر التاريخ ....فلقد قلتها وساعيدها الشعب السوري بنفسه طالب بنفسه ان تكون الاردن جزء من سوريا ...والشعب السوري لطالما يحمل الحقد للاردن ولشعبه على مدار التاريخ ....ولكن تعودنا على النسيان بسرعة ولو عرفتم بما يحدث في المحيط من اللاجئين في الاردن بالفترة الاخيرة لوجدتم ان نسبة كبيرة من الاجئين لايتعاملون ولايستحقون مبدا الضيافة ولكن سابقى اردد ان عروبتنا غلبت وطنيتنا

ودائما اردد المثال ماحصل في السنة التي تحدثت عنها دموع وماحصل فيها من مؤامرات ضد الاردن من كذا وكذا ...جهات حاقدة على الاردن ومع ذلك استقلبناهم بكل وساعة صدر ولكن لايلدغ المؤمن من الجحر مرتين ولكننا نلدغ للمرة الالف ولانقول لا ولا ولا

ونحن كاردنيين اصل مازلنا نعاني من اخطائنا ونعزي انفسنا ولهذا غريزة الخوف والتردد يجب ان تولد لدينا ومع ذلك نمتلك قلبا لطالما ما امتلكه غيرنا بل امتلك حب السيطرة وحب النفوذ لمصالح شخصية ومارب شخصية




اتمنى ان نسمع نقاش حول اللاجئين السوريين وتاثيرهم فقط على الاقتصاد الاردني

[صديقه بنت الشديفات]

ضمن قواعد اساسية وهي كالتالي
اذا انا نفس شعبي شبعان ونفس الشعب بيقدر يقدم مساعدات للاجئين معناه اهلا وسهلا فيه
اذا حكومتي قادرة تفصل بين لاجئ ومواطن اردني بساعدهم
ااذا نفسهم الاجئين بيحترموا مبدا الضيافة بحترمهم


اولآ انا كـ مواطنه في بلدي الاردن بحكي انه كلامك صحيح ويوصل فينا لدرجه من الرقي في التعامل
و انتباه من مصالح او اغراض البعض
يعني بيني وبينك بسمع انه اغلب الاشياءات اللي تصير بالبلد سببها بشكل غير مباشر
اخوانا من بعض الدول المجاوره او اللي تسموهم لاجئين

خلينا نكون واقعين كفكره مرغوب فيها يعني حديث البلد صار عنا السوريين
بشكل غير مباشر او مباشر بدأو مرغوبين من الجميع
اللي بده يجوز ابنه يحكيلو خذ بنت سوريه كمبدأ انا مو رافضيتو لكن الوضع حاليا ما يسمح
لانه تجاوزنا خطوط كثيره اغلبها تمس افراد الشعب الاردني ،،

،،

::
::

صدقآآ رح اختصر كل كلامي بـ ( الوضع مأساوي )
بإختصار لانه بعض من افراد شعبنآآ ما عنده الاكل ،،

:(

[محمد العزام]

بشكركم على تعليقاتكم الرائعة والمتمثلة بالعاطفة لحب الوطن والغيرة على مقدراته وحب العمل لبناءه




رح نطرح قضية جديدة


باقتراب شهر رمضان ......
بنلاحظ تدافع الناس للشراء او بالاحرى للتخزين
هل المواطن مجبر على عمل ذلك بشكل عام
ام انه يجب ان يكتفي بشراء كل يوم بيومه لحتى يحصل غيره على مثل ماحصل
هل يؤدي تدافع الناس للشراء من ارتفاع اسعار السلع والاستغلال



بالنهاية هل يجب على الحكومة تنظيم ذلك اام انها غير مسؤولة تماما عن ذلك




اود ان اسمع تعليقاتكم الكريمة

[محمد العزام]

رح اترك المجال لليوم للنقاش بالقضة الي طرحتها


واذا ما كان في تفاعل رح اطرح قضية جديدة

[&روان&]

السلام عليكم
موضوع مهم
هلا بالنسبة للمواطنين عنا هون وين ما بيكون في مناسبة متل عيد او رمضان او بيسمعوا انو في تلج او اي شي متل هيك
كلهم او الاغلب بيحاول يشتروا اكبر قدر من السلع لي يتم تخزينها باعتقادهم انه بهاي الفترة رح يخلص كل شي
وهدا برأي غلط واكبر غلط كمان
وكل هاي الامور بتدفع التجار انهم يستغلوا هاي الامور ويرفعوا الاسعار والمواطن بيطر انه يشتري
لو كل المواطنين يعملوا على عدم شراء السلع او التخفيف منها رح يلاحظ التجار الفرق وبالتالي ما ترتفع الاسعار وكل شي رح يكون طبيعي جدا بس احنا الي بنسمحلهم يعملوا هيك

ودور الحكومة هون انها تنظم الكميات السلع المتواجدة في الاسواق بحيث تكفي المواطنين

وشكرا الك على الموضوع

[الوردة الاردنية]

موضوع كثير من واقعنا الي منعيشه حاليا
هل المواطن مجبر على عمل ذلك بشكل عام
لا مو مجبر لكن صارت عادة عنده انه بمجرد ما يسمع انه رمضان جاي وببلش يشتري ويخزن وكانه برمضان رح تصير مجاعة مع العلم انه رمضان برك يعني ربنا بطرح البركة والكثرة بكل شيء
ام انه يجب ان يكتفي بشراء كل يوم بيومه لحتى يحصل غيره على مثل ماحصل
اكيد لازم يكتفي عشان يعطي دور لغيره بالحصول على المؤنة الي بريدها
هل يؤدي تدافع الناس للشراء من ارتفاع اسعار السلع والاستغلال
اصلا صاحب الدكان او بشكل عام اصحاب المحلات لما يشوفوا المواطن هيك صار يشتري كميات كبيرة ويخزنها ببلش يستغل الموقف لصالحه ويحكي لحاله ليش ما احتكر السلعة وابلش اغلي السعر على هالمواطن المسكين
بس برجع وبحكي المواطن هو السبب بارتفاع الاسعار



بالنهاية هل يجب على الحكومة تنظيم ذلك اام انها غير مسؤولة تماما عن ذلك
اكيد مسؤولة ولازم تعمل على تنظيم هالموضوع بشكل او باخر
شكرا محمد قضية مهمة بالفعل لمجتمعنا

[دموع الغصون]

الخطأ مشترك بين الشعب والتجار
التجار بحاولو يستغلو هيك مناسبات والشعب بفكر انه لازم يجيب كل شي مره وحده
رمضان متله متل اي يوم يلي رح تاكله وتستعمله بهاد الشهر متله متل اي شهر
يعني ليه البكه و الربكه و الهجوم الغريب على الاسواق مابعرف

يسلمو محمد على القضية المهم اجت بوقتها

[هدوء عاصف]

يسعد صباحكم وكل عام وانتم بخير .. شكراً محمد على القضية الهامة ..
برأيي الحكومة غير ملامة بالموضوع يعني ما بتقدر الدولة تمنع بيع السلع فوق حد معين للمواطنين ، لو عملت اذا فقدت مؤسسات الحكومة مصداقيتها ورح تنتشر الاشاعات وقتها انو هالسلع اصبحت محدودة ورح تزيد الأزمة بعدها ما احنا ما شاء الله الاشاعات عنا بتنمى مصادر الإبداع عن الناس وبتظهر افكارهم التطويرية مباشرة بمجرد ما تطلع الإشاعة!!

المُلام الأول والأخير بهالقضية هو المواطن ، المواطن اللي صار ما يعجبه اشي ، اذا الدولة اعطته راتب الشهر بأول رمضان بصرفه تاني يوم وبشتري فيه السوق وبعمل ازمات ، واذا الدولة اعطته نص راتب بطلع اعتصامات ومظاهرات ، يعني بالمختصر احنا شعب بدو كل اشي عالمتريّح ، مع اني شخصياً ضد اجراءات الحكومة وبعتبر نفسي مع الجماعات الاصلاحية لإنني أؤمن انو بالحكومة فيه فساد اداري ووظيفي مستفحل ، لكن مشكلتنا كمواطنين اردنيين انو عنا جهل وتخلف ونفاق ببعض الأمور -الا من رحم ربي وما بعمم- ، بدنا 100 سنة لحتى نفهم شو معنى الاعتصام السلمي حتى تحقيق المطالب ، بنتصرف مع بعضنا ومع الحكومة بهمجية ، عنا تقليد اعمى وعنا عنصرية وعشائرية رح تقضي علينا اذا ما تداركنا الوضع .. الحل لمشكلة التهافت على الاسواق والمشاكل الأخرى هو الوعي لدى المواطن ، المواطن هو الملام بالدرجة الأولى ، وبالنهاية ما بقدر المواطن ييجي يعترض وهو غارق بالأخطاء متل شغلة الأب اللي ما بصلي وبترجى من ابنه يطلع يصلي ، مهو لو طلع ما بصلي ما بقدر ييجي يقوله صلي ، لانو وقتها ابنه رح يرميله كلمة يحرجه فيها ..

"كل واحد فينا يبدأ بنفسه .. وكفى" ...... :)

كل الإحترام لمحمد ولجميع المشاركين.

[shams spring]

مممم باعتقادي المشكلة تكمن بالفهم الخاطيء لرمضان
لهيك بعملو هجوم على الاسواق والمؤسسات الاستهلاكية وكأنو الاكل رح تخلص
.
.
لو الكل يعيش كل يوم بيومه ما بتصير هلأزمة ...الشغلة بدها شوية وعي
تشكرااات محمد

[محمد العزام]

اراء حلوة وتفاعل اكثر من رائع من الاعضاء
الله يعطيكم الف عافية يارب

ورمضان فقط مجرد التفكير بهالكملة لازم تكون هداية وتقرب والابتعاد عن المظاهر اللي رح تسيء لتقربنا من رب العالمين او حتى تسيء لاي شخص بحياتنا

مجرد التزاحم لى المواد الغذايئة بحد ذاتها اساءة لبعضنا البعض عشان هيك لازم نبتعد عنها لانو نحنا في شهر الخيرات والتعفف عن الطعام والشراب وجعل التقرب الى الله من اولوياتنا


مرة ثانية بتشكركم ورح نطرح قضية جديدة من ضمن واقعنا

[محمد العزام]

اهلا وسهلا فيكم من جديد


بقترح هالموضوع بشي او بنوع من التجسس على احوال المواطنين لكن هالشي صار واضح


حالة الركود الاقتصادي عند المواطن خاصة بهالفترة

هل هو نوع من عدم الوعي ام ان المواطن مجبر عليه


خلال الفترة الي سبقت العيد المواطن استلم هالراتب فكان الالتزام بالعيد ومتطلباته وبعدها كان في رجعت هالطلاب للمدارس واللي بيلزمها من مصاريف ومن امور ثانية كتجهيزات من قبل المواطن لاسرته ولاطفاله ومن بعدها في الجامعات واللي بيتبعها من مصاريف

كدخل المواطن مابسمح يمشي هال3 امور بنفس الوقت وخاصة براتب واحد

اللي بدنا نحكيه واللي حاب اوصله الكم
المواطن لما استلم الراتب قبل موعده كان بالامكان افضل مما كان في تقسيم الراتب وعدم الظهور بشكل يفوق قدرته كونه فترة عيد وطلعات وشمات هوا
والا كان بمقدوره يستغني عن هالاشياء لانه في قدامه مشوار طويل لحتى اقل مافيها يحصل على راتب الشهر اللي بعده

ام ان الحكومة ماحسبت حساب هالشي للمواطن واعطته جزء من راتبه وخلت الجزء الثاني لوقت غير هيك لحتى المواطن مايوصل لهالمرحلة من الركود الاقتصادي بجيبته


بعتقد وصلت الفكرة لالكم وحاب اشوف مشاركاتكم

[محمد العزام]

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !

[دموع الغصون]

هلا المفروض كمسؤول رتب اولوياته وعمل حسابه من قبل لفتره لتلات شغلات هي
عيد ومدرسه وجامعه
هلا الخطأ مشترك بين المواطنين و الحكومه
الحكومه كان فيها تعطي جزء من الراتب قبل العيد والجزء التاني بالموعد المعتاد
الخطأ الأكبر على المواطن مو قادر يرتب اولوياته و ينظم اموره


يسلمو محمد على طرح القضية الهامة
قضيه مو سهله ابداً وبتلامس الكل بمختلف الدرجات والمستويات

وبعتزر على التأخر بالرد

[محمد العزام]

عدنا مرة اخرى لنفتح مواضيع قابلة للنقاش في حياتنا
ربما هي مسائل تعدت في كثير من الاحيان حدا معين ضروف معينه نطاق اوسع من النطاق الذي كنا نتوقعه

تلامس حياتنا كمفهوم اساسي وليس بكماليات

عندما ننظر بعيوننا الرقيقة لطريقة عيشنا فانها تبكي وان لم تبكي فانها ستدمع
ربما هذه الدموع تزيدنا بريقا وجمالية وربما العكس



عدنا كما قلت مرة اخرى بموضوع جديد
ربما قابل للنقاش للذين يهتمون به



عندما نخرج يوميا الى اشغالنا سواء بمواصلات خصصت لنا او بمواصلات هي ملك لنا
او عندما نستيقظ ولايوجد لدينا اشغال فاننا في بيوتنا نفتح على قنوات لطالما نسمعها يوميا

نجد في المحطة الفلانية مقدم اذاعي يدافع عن المواطن ويسب ويشتم المسؤولين وقلبه على المواطن
وعلى محطة اخرى نجد نفس الكلام ونفس العاطفة من مقدم اخر


ولكننا نسمع عن هذه البرامج منذ السنين ومشاكل بالمئات لا وبل بالالاف
واستغرب من احدى هذه المشاكل بمشكله خطيرة عرضت على احد مقدمي هذه البرامج من سنتين ولكن اتصل نفس الشخص بنفس المقدم وافاد بان المشكلة لم تحل منذ ذلك الوقت اي من قبل سنتين


السؤال الان
هل اصبحت تلك البرامج الاذاعية فقط برنامج لفضفضة المواطن ليس اكثر
وان كانت كذلك فهل بالفعل نحتاجها نحن في حياتنا

هل ثقتنا بهؤلاء المقديمن للبرامج مازالت كما هي من قبل اي من اول ما سمعنا باسمائهم
وهل ثقتنا بهؤلاء المقدمين مازالت نفس الثقة عندما نسمع بان احدهم يسهر ببيوت الدعارة او يمسك كاس خمر بيده

هل اصبحت تلك البرامج فقط للضحك وللعب بمشاعر المواطن او برامج فقط لفضيحة المواطن خاصة المواطن الفقير


انتظر ردودكم

[دموع الغصون]

الموضوع واضح كلّ قناة مسيسة لخدمة فئة معينه وكل جهه الها أهدافها و أجندة خاصة فيها
الإعلام اليوم ومبارح وقبل سنوات ولبعد سنوات رح يضل هيك انعدم المصداقية والشفافية
انعدمت النزاهه المهنية و الكرامة الإنسانية
أصبح المواطن موضع رهان وتصفية حسابات بين الكبار
أصبح المواطن كورقة تتقاذف بين المحطات لكسب الشهرة و السمعه و المواقف على ظهر الإنسانية ومساعدة الغير
للأسف في جهل كبير من مواطنا لليوم عنده ثقة عمياء بالإعلام عنده جهل وعندها تبعيه
المفروض يكون اكثر وعي و إدراك لحقيقة الإعلام وتوجهاته

[الوردة الاردنية]

هل اصبحت تلك البرامج الاذاعية فقط برنامج لفضفضة المواطن ليس اكثر
وان كانت كذلك فهل بالفعل نحتاجها نحن في حياتنا
شوف يا محمد زمان كانت فعلا هالبرامج تساعد وتدعم المواطن اما هلا فلا فمثلما انت قلت اصبحت بس للفضفضة لا اكثر ولا اقل من ذلك وصراحة نحن في هذا الزمن وفي هذا الوقت بالذات لا نحتاج لمثل هذه البرامج نريد برامج بحق تقوم بحل مشاكل المواطنين

هل ثقتنا بهؤلاء المقديمن للبرامج مازالت كما هي من قبل اي من اول ما سمعنا باسمائهم

طبعا لا لانهم اكيد رح ينزلوا من عيون المواطن والمستمع ، كوني انا مواطنة وانا عندي مشكلة واعرضها على مقدم من مقدمين البرامج الي بنحكي عنها وبنفس الوقت ما يقدم لي حل لمشكلتي التي اعاني منها من سنوات اكيد رح يفقد ثقتي بطريقة او باخرى

وهل ثقتنا بهؤلاء المقدمين مازالت نفس الثقة عندما نسمع بان احدهم يسهر ببيوت الدعارة او يمسك كاس خمر بيده
على الاكيد رح ننظر لهم نظرة مختلفة تماما عن الاول

هل اصبحت تلك البرامج فقط للضحك وللعب بمشاعر المواطن او برامج فقط لفضيحة المواطن خاصة المواطن الفقير

ايوه هاي هي فقط عبارة عن ورقة شدة يتم اللعب به وبمشاعره كيفما شاء المسؤولين والاخرين وكل ذلك على حساب هالمواطن المسكين المعتر


موضوعك حلو ورائع وبمس واقعنا الحالي
يسلمو محمد

[محمد العزام]

مشكورين على المرور
دموع ....الوردة

[محمد العزام]

عدنا لنطرح موضوع اخر يهمنا خاصة في هذه الايام لما نعيشه من قرب للانتخابات


يوميا قاعدين بنسمع شكاوي كثير من قبل المواطنين لما يحصل من الدعايات الانتخابية
سواء من نشر هذه الدعايات الانتخابية على اشارات المرور او على الطرقات
وهي تشكل اعاقة لحركة المرور كما انها يمكن ان نعتبرها منظر غير اخلاقي لبلدنا


برايكم من هو المسؤول عن هذه الامور

ومن هي الجهة التي يجب ان تتابع مثل هذه الامور

وماهي المخالفة او المخالفات التي يجب ان تعطى لكل مرشح يقوم بمثل هذه الاعمال

وماهي الطرق الصحيحة التي تجنبنا جميع هذه المشاكل



بانتظار ارائكم

[هدوء عاصف]

محمد مشكور على هالموضوع واجا بوقته يا كبير لإني لسا من يومين علقان بهالقصة ، هاد يا سيدي كان الي يافطة بالحصن فوق البريد لمحل تجاري وما صارلي يومين حاططها ، ولا جايين 2 من المرشحين شالوها وحطوا يافطاتهم ، طبعا انا ما بعرفهم ولا بعرف تلفوناتهم ، وسألت وما حدا فادني بشي ، فتت ع صفحاتهم على الفيسبوك وتركت رسالة طويلة عريضة بعبر فيها عن سخطي بإهمالهم المتعمد لحقي بالتعبير والإعلان عن تجارتي ليعبروا هن عن بضاعتهم بهالطريقة السخيفة ، الاول ما اعترف والتاني ما اعترف ، وواحد منهم بقول انا دافع 4000 دينار بدل تأمينات يعني بعلق وين ما بدي اما انت فتعتبر مخالف واصلا لو بدنا نيجي للصح البلدية لازم تشيل يافطتك ، المهم ما تركولي مجال للنقاش معهم كانوا كتير سخيفين وعقلياتهم متحجرة ، فلجأت بالأخير لمخفر الحصن وشكيت عليهم ، المهم وبلا طولة سيرة اجو يترجوا وكل واحد عرض علي يافطتين بدل اليافطة الوحدة ، طيب ليش لعاد هالبهدلة هاي؟ كان من اول مشيتوها ومشي الحال!!

الخلاصة : انو بعض النواب بعتدوا على املاك الدولة واملاك الناس بحجة الدعاية الغنتخابية وهاد الشيء مرفوض رفض تمام ما بقبله المواطن ولا الحكومة ، ولازم البلديات تراقب بشكل صارم ممارسات النواب هاي وبشكل مستمر ، ولازم احنا كمواطنين ما نسكت عن هالمخالفات ونبلغ عن اي شيء مش طبيعي بنشوفه ، وعلى ما اظن انو فيه ارقام للتبليغ عن المخالفات هاي ، ويا ريت اذا حدا بعرفهم يخبرنا فيهم ...

شكراً محمد موضوعك رائع :)

[محمد العزام]

مشكور هدوء

بالفعل هي ظواهر غير اخلاقية وغير مجدية
ما انت يامرشح بتكون عارف شو هي قاعدتك مافي داعي لكل هاليافطات او الدعاية باساليب اخرى

[دموع الغصون]

أنا مارح علق كتير لكن المكتوب باين من عنوانه ازا بحملته الانتخابية هيك كان مصلحجي و أناني وفضل مصلحته على المصلحة العامة وكان فوضوي و عشوائي وغير مدرك ولا واعي
فكيف رح يكون بعد ما يدهل للبرلمان

[محمد العزام]

مشكورين على الردود


حاليا اريد ان اطرح نقاش اخر طرحته قبل فترة ولكن هذا النقاش حاليا اصبح من ضمن حياتنا الاساسية

بالنسبة لمن نسميهم بلاجئين سوريين ممن يعيشون على ارض تراب هذا الوطن
اصبحنا نرى في الفترة الاخير وان صح التعبير تمرد وانفلات ولو يملكون القدرة لتيحكموا بنا بكل شيء
ولكن ارى ان الاوضاع حاليا لاتطمئن لاننا اصبحنا نرى انفلات غير مسبوق منذ دخولهم للاراضي العربية

لا اشمل الكل ولكن هناك عناصر تريد التخريب وبالاحرى قبل فترة واعتقد ان الجميع شاهد تلك الصورة الي يبين فيها مجموعه من اللاجئين السوريين يتوعدون للحكومة الاردنية
مطالبهم اصبحت واضحة يريدون حياة كريمة في الاردن بغير المخيمات لانهم يقولون ان الحكومة الاردنية تاخذ مقابل ذلك من الامم المتحده وغيرها من الجمعيات الانسانية وان الحياة التي يجب ان تتوفر لهم في شقق سكنية او فنادق
برايكم كيف ترون هذه الاوضاع وكيف اثر دخول اللاجئين على الاردن بشكل كبير حتى على المواطن الاردني
واين دور الحكومة عنهم في الضبط والالتزام بالقوانين وتطبيقها بشكل حرفي عليهم

انتظر ردودكم