نكشات عاشق الحصن _ الحلقة الثامنه _ في الجامعه

[عاشق الحصن]

اهلا و سهلا بالشباب و الله

في يوم عادي من ايام الجامعه

كان عندي مادة مختبر الدوام فيها تلات ساعات على نفس واحد

اول يوم دوام......
واقف على باب القاعة انا و الشباب و قاعد بسرح فيهم
و بقولهم كيف غلبت ابو النبالي بلعبة التركس امبارح " عاد انا كمان شوي الـ CASE تبعي بربح سيارة و ماكل شيوخ كبة لشبعت "

فجأة لقيت الشباب سرحت و بطلت تستقبل
لفيت وجهي بدي اشوف شو الموضوع

و يا سلام على اللي شفتو
كمشة بنات جايات ....و كل وحدة لابسة " بابا سمحلي" و ماشيات باحترامهم عالاخر يعني ضحك و مياعة
وانا هاد الإشي ما بحبه

و انا ما الي أصلا بالتطـــقــــيس عالبنات
بس عبال ما صارو جنبنا كان دوري لانو كل اللي قدامي رموا حكي
فأنا استحيت تطلع علي بالجامعة اني ما بعرف ارمي حكي....

ولما صارو جنبنا
اطلعت على وحدة شكلها هادية ومش لابسة كعب "لانو الكعب شكلو بوجع " تحسبا يعني لاي طارق

وقلتلها بكل قلب قوي
اللهم صلي على سيدنا محمد

وما لقيتهم غير وقفوا العرض العسكري اللي ماشيين فيه
و لفت البنت علي

انا اتخذت و ضعية استعدادية
تحسبا لأي هجوم يعني .... و حطيت في بالي عدة احتمالات
بين انها تبلش تردحلي و تلم الناس علي و صولا الى ابعد احتمال و اللي هو المزح بالايدين
بس الصراحة كنت خايف تتهور و تسلخني بزقــــة

بس اللي صار انها ضحكت و قالتلي
تسلم كلك زوء

انا طلعت على حالي ... بعدني عايش !
و البنت انبسطت و انا اول مرة بطــقــس عبنت حسيت حالي الي مستقبل شنيع
و كبر راسي انا ... و الشباب كلهم خف عقلهم و صارو بدهم يزقفولي

مش هون النهفة
النهفة انا دخلنا عالمحاضرة
و طلعو البنات معانا كمان
و أكثر من هيك ... اجت البنت و قعدت جنبي ...ما تفهموا غلط القعدة كانت عالتسلسل و ارقامنا كانت ورا بعض

انا من كتر ما انحرجت و انعجــقت الدكتور قعد بنادي على اسمي و انا بقول مين الأهبل هاد اللي ما برد
و طلعت أنا ......نسيت اسمي

معلش كنت ايامها سنفور
و الشباب قاعدين ورا و بضحكو علي ...لانهم بقولو و جهي صار يجيب ألوان

و بلش الدكتور يعبي باللوح و احنا ننقل من وراه و البنت يا حرام مش ملحقة عليه و كأنها طلعت بتشوفش الا بسماعة
وكل شوي تسألني شو هاي الكلمة و شو يعني هاي

و اخر اشي بتقوللي ممكن تمسكلي المراية بدي ازبط مكياجي

"انا الصراحة حابب امسكلها المراي " يعني البنت أمورة و نغشة
بس الشباب اللي ورا تاركين المحاضرة و متبعين الي و للبنت

قلت هسا بقولو عني خز نشيط " يعني رخيص بالعامية "
و بس يشوفوني وانا كيوت و ياي مع البنت بتتغير نظرتهم الي و بفقد سيطرتي عليهم

الصراحة انا خفت امسكلها المراي و تطلع بالاخر مصلحجية و تطقعلي و اخسر الشباب عالفاضي
فحميت معي و بلشت ابهدل فيها

شو شايفاني ؟ بتقوليلي امسكلي المراي كمان شوي بتقوليلي روح جيبلي قهوة ...
و انا الصراحة اندمجت وعشت الدور و صرت اعلي صوتي

ناسي انو في دكتور بالقاعة

الدكتور طبعا بس استوعب الوضع طردنا برة انا و البنت و قلنا اسقطوا المادة

انا اول ما صرت برة زعلت عالبنت كتير السلام خاصة انها صارت تعيط و تتأسف
و هي يا حيام بعدها سنفورة مش عارفة شو تعمل
فــ رحت اخدتها عالتسجيل و دورتلها على مادة تانية بنفس الموعد و سجلت فيها انا وياها و جبتلها عصير ليمون .....

انا قلبي حنون

و بعد هداك اليوم حرمت اطـــقـــس على بنت


ملاحظة

جميع الشخصيات من وحي خيال الكاتب ولا تمت بالواقع بأي صلة

[طوق الياسمين]

والله بضحك كتير بس يا ريتها صحيحية
يسلموو

[عاشق الحصن]

اهلا و سهلا دموع

ليش لا

ممكن انها تكون صحيحه ما بتعرفي شو اللي صار ما هيك

على كل نورتي

[بياض الثلج]

حلو لما يكبر الراس

بتجنن يا ابو الزوز

[عاشق الحصن]

الله يحلي ايامك يا هناء

نورتي النكشة

[أميرة قوس النصر]

[صديقه بنت الشديفات]

يا حياااااام يا زيدو طلعت عايش الدور
مع انه هالدور الكل بعيشه
دامت نكشاتك زيد

[شمعة امل]

هههههه
الله يعطيك العافيه

[تحية عسكريه]

شو زيد والله ما عرفتك طالع بتعرف تعاكس يا رجل كان قولتلي كان اخذنا درس عند حضرتك

[بياض الثلج]

ليش مطلعة لسانك ولي ستي المديرة

هع هع هع