خطة لتطفيش عريس

[احساس المطر]

خطة لتطفيش عريس
وخصوصا اذا كان العريس مش حسب المواصفات الموجودة في الكتالوج



نبدأ الخطة سوا



1- لا تظهري لاهلك عدم الرضا ... (عشان تعرفي تكملي الخطة)


2- اهم اشي بالخطة من يوم ما تسمعي بالعريس لحد ما ييجي اوعي تتحممي .
خلي الريحة الحلوة تطلع ...تنسيش تفرمي بصل كتير واذا في ثومة خيييير و بركة .

طبعا (انتي عم بتساعدي ماما ما حد رح يحكي معك)


3- طبعا اليوم اهل العريس بدهم ييجو يشوفو (قمر الزمان) عشان هيك قمر الزمان لازم تضل نايمة

لقبل الموعد بساعة (عشان وجهها يتريح وما يبين انه تعبان) وهيك بتكوني ضيعتي على اهلك فرصة
انهم يكشفوكي.



4-اهل العريس (ابو الشباب) اجو... سلمي على امو بكل برود ... واعملي حالك قرفانة و شايفة حالك
بعدها اسحبي حالك على غرفتك ... (عشان بدك تزبطي حالك ولو ... )


و يلا نعرف خطوات احلى ميك
أب لهيك مناسبة :


*الكحلة : الكحلة جميلة جدا على العيون ... اتكحلي .... بس خلي الكحلة بعين اكتر من التانية..
وهيك بتضمني تكوني (حولة رسمي)


*كريم الاساس: ولوووو اكيد بدنا كريم اساس بس على الشفايف .. هيك ببين معك فقر دم


*الشادو : طبعا الشادو هو اللي بخبي البلاوي (وهو اللي ببين البلاوي ) الشادو الاسود على العيون


و ثقلييييييييه (ولوو مش هيك الموديل و الدليل اليسا) مع شادو اصفر على وجهك بدل (البلاشر)
وهيييييييك ببين معك كوليرا



و لازم تلبسي احلى موديل : تنورة خضرا (لون الخير ) و بلوزة حمرا (لون الحب) و البسي شالة
من سنة الف و تسعمية و ستة وخمسين خشبة و البابوج من العصر الحجري... توووووحفة


5- روحي عالمطبخ عشان توخدي القهوة ... بس اوعك امك تنتبه عالخبايص..


6- امشي بكل ثقة الى غرفة الضيوف ...(كل ما تكون ثقتك بنفسك اكتر بتبيني انك خبيرة
بهالامور)... وهيك .... ببلش الفار يلعب بعب ابو العريس ... وبصير يسأل حاله:
مدامها خبيرة هيك ليش اللي قبلنا
طفشو؟!!

(بس الفار بعب الابو ما بكفي ... لازم يكزدرلو شوي بعب العريس ابو الشباب)
امسكي القهوة ... اتفرجي بعيونه (واحولي عينيكي)... المسكين بكون وقع في الصدمة(من اول نظرة)


هو طبعا من شدة الصدمة رح ينسى القهوة... ذكريه وقوليله: " اي خلثنا يا ذلمة طول"
(يا عيني عاللي بقرطو .... بس اوعي ابوكي ينتبه)


طبعا دشري الزلام يحكو بالمهم .....
ارجعي لام العريس اللي بدها تشوف جمال شعرك

(هالمرة ما بدنا نعمل مقلب ... خليه حلو فش مشكلة ... سشوريه و اربطية بس
اقعدي اهرشي و اهرشي و اهرشي قدامها ... تخيلي انه في حديقة حيوانات في راسك ...


مسكينة ام هالعريس


اذا نفذتي هالخطوات مية بالمية باكدلك ...رح تسمعي كلمة

: " يا الله " ... وتسمعي صوت ابوكي
بحكي للجماعة " شرفتونا" ... لانه الضيوف بدهم (يفلسعو ) قبل ما ينبلو هيك بلوة منيلة ....



اما انت ايها الشاب
... فعشان ما يصير فيك هيك مقلب ...


قبل ما تفكر تتجوز او تخطب ... تاكد جيدا انه فيك هذه الصفات


(حسب مؤسسة المقاييس و المعايير الدولية للصبايا في زمن الفضائيات)



1- رومانسية و جاذبية : (حبيب الصبايا) تامر حسني


2- طولك طول احمد عز واذا اطول خير و بركة.


3- ثقافة : جورج قرداحي


4- اناقة : نيشان ديرهورتنيان


5-عندك مواهب (طوني ابو جودة)


6- ضحكة وسنان : محمد حماقي ...(اموت واعرف شو المعجون اللي بيستعمله)


7-خفة دم : احمد حلمي ...


وتكون اعمى عن غيرها .. واطرش عن عمايلها... واخرس متسالهاش




بالاخر بقلكم الله يوفقكم بزوجاتكم فهادا ما اتمناه

[عُبادة]

ما ظل غير تكسر اجرها مشان تبين عرجة

[Zhrt_ALm6r]

وتكون اعمى عن غيرها .. واطرش عن عمايلها... واخرس متسالهاش

احلى المواصفات

[The Gentle Man]

اي بتحكو ليش في عوانس
من هاي السوالف
اي تجوزي وخلصي
شو هالبنات هاي
هاي يعني بطلنا نخطب

[اجمل حب]

اقتباس:
المشاركة الأصلية كتبت بواسطة The Gentle Man
اي بتحكو ليش في عوانس
من هاي السوالف
اي تجوزي وخلصي
شو هالبنات هاي
هاي يعني بطلنا نخطب

انا معك جنتل مان انه بهي الشروط محدش من البنات راح يتجوز
لانه مفش ولا شب بتجتمع فيه هي الصفات
والله يعين الاهل

[عاشقة الاحزان]

اي بتحكو ليش في عوانس
من هاي السوالف
اي تجوزي وخلصي
شو هالبنات هاي
هاي يعني بطلنا نخطب

لا تخاف على حالك بتخطب انشاالله بس شد حليلك وتخرج اول البنات زي الهم على القلب

[أميرة قوس النصر]

الشاي البارد حل كل اشي

[اجمل حب]

شكلك ناوية للبنات نية سودا
شكرا على المضوع

[عاشقة الاحزان]

الله يسامحك على هيك نصايح عمر البنات ما راح تتجوز بهاي الطريقة كلهم راح يظلوا عند اهليهم

[محمد العزام]

مخدوش يا بابا مخدوش