لعلني عندما اخترت هذا العنوان لهذه المقالة لم أجد أنسب منه .......
يا شباب ويا صبايا اليوم بدي احكي شوي عن كليتنا الحبيبة التي تعاني وتلفظ انفاسها الأخيرة
أكيد ما في حد بينكر فضل الكلية عليه وزي ما إلها عيوب أكيد إلها محاسن ومن أهم محاسنها انها تضم طلبة جامعيين بمعدلات منخفضة نسبيا في كافة التخصصات البكالوريس والدبلوم إذا ما قارناها بالجامعات الأخرى . لكن كليتنا باللمقارنة بالعيوب اللي فيها فأن محاسنها صفر على الشمال .بجوز اقدرت هون ألخص بعض هاي المشاكل وأرجو من اللي بيقرأ هدا الحكي يوخده على محمل الجد
في البداية بجوز أنا رحت لنقاط شكلية البعض بيستسخفها وبيعتبرها سطحية لكن خلينا نفكر شوي كلية صغيرة بهالحجم مش سهل علينا نعملها تحفة فنية
أولا: بس تكون مخلص محاضرة وبدك تتطلع تشرب كاسة نسكافيه بتطلع لجهة نسكافيه فلافير متلا وانت راجع على الكلية ورايح على الخوارزمي بدك تدخل من البوابة اللي فوق بيلقاك الأمن وبيقلك ممنوع هدا مدخل سيارات وبتضطر تلف اللفة كلها وتطلع للخوارزمي مع انه قدامي صار هالحكي طلاب كانوا بدهم يدخلوا من المدخل اللي فوق منعهم الأمن بعد جدال لمدة 5 دقائق تقريبا وما دخلهم فيش دقيقتين بس راحوا الطلاب اجت بنت امورة فتحلها الباب ما علينا.
ليش عاملين هيك ما بعرف مع انه بيقدروا يقسموا المدخل للسيارات وللطلاب ويحطوا رجل أمن للهويات مش قصة كبيرة والحال نفسه عند البوابة اللي تحت الموجودة جهت المسرح اللي مخصصة لسيارة العميد لأنها قريبة من الفيلا تبعته هاي البوابة كمان ما بتنفتح للطلبة للأسف وكأنه الدخول منها حرام والضغط كله على البوابة الرئيسية اللي ياريت يغيروا مدخلها بدل ما هي عاملة زي مدخل المدرسة
ثانياً : بس تدخل اتسجل بالكلية لأول مرة بنتابك شعور غريب جداًُ بتروح على المسرح بتلاقي ناس زي كأنك بحسبة مركزية بالضبط وبتلف على خمسين واحد لتسجل بالكلية واخر شي بتقعد تستنا دورك ليطلع اسمك وتحاسب اقل شي بتقعدلك ساعة زمان وبكون الأمن ينادي على الأسماء واذا ما سمعت راحت عليك والله اشي بخزي وبيفتقر للتنظيم بتحس حالك فعلا بحسبة وراسك بيصدع( احسب حسابك بس تيجي تسجل جيب معك بندول)
ثالثاً: بس تدفع عند المحاسب بدفعك رسوم خدماتية مبلغ مش بطال عشان الخدمات اللي بيقدموها زي اللي عن جد
والله يا ناس ما بدنا خدمات خمس نجوم ولا اربعة ولا ثلاث ولا شي بس بدنا هالأشياء
ثلاجات لشرب الماء ما في غير تنتين بالخوارزمي وحدة ما بتشتغل والتانية كمان مرات ما بتشتغل وحاطينهم جهة دورة المياه اما بالمبنى الرئيسي فحدث بلا حرج ما في غير اللي عند العيادة شغالة وبتضر بالصيف تروح تشتري مية من الكفتيريا اقل شي علبتين باليوم
وبالنسبة لدورات المياه فهي عبارة عن مكره صحية داخل الحرم الجامعي ما فيها اي نمط من انماط النضافة وبدون تكملة احسن.....
بعد ما ازداد عدد الطلبة ووصل تقريبا 5000 طالب حسوا انه ما في هناك مكان للطلبة للجلوس فيه فصاروا يوزعوا بالكية مقاعد موزعة بشكل عشوائي سخيف ومضحك فمعظم المقاعد لا تصلح للجلوس عليها الا وقت الصباح وبعدين انسى الشمس بتضربك اذا قعدت عند الظهر فبتضر تروح تقعد داخل المباني وبصير الدكتور يطلعلك اسكت يا ابني ووطي صوتك الله يرضى عليك ونفس الحالة بالنسبة لجهت المسرح بتلاقي هناك احسن وابرد مكان بالصيف لكن يا ويلنا اذا بيوم من الايام كانت عائلة العميد بالبيت بصير الامن يمنعك من الجلوس هناك الحل واضح بدنا مضلات وما في غير تنتين مرات ما بنلاقي مقاعد كلها فل بنروح نرتكي على سيارات الدكاترة اللي بيطلعوا وبصيروا يصيحوا بتشخطوا السياراة لا تقعدوا على السيارات انا جايبها على الكلية لترتكي عليها....
اكيد هم معهم حق بس احنا كمان معنا حق
بالنسبة للمكتبة اللي الواحد بيستحي يحكي انها مكتبة مساحتها لا تتجاوز 36م مربع بتدخل عليها زي كأنك داخل على صف خامس ابتدائي مش عشان الهدوء عشان اللي بتشتغل هناك بتكون قاعدة وعامله ديوان عندها و يا ويله اذا واحد حكى بتصير اتطبل على الطاولة وتصيح بديش ولا صوت اللي بحكي بطلع بره وكأنها بتهت عليه انها سامحيتلي ادخل المكتبة لأنها مكتبة اللي خلفها والله صرت أخاف ادخله من وراها وطبعا هالمكتبة الفخمة لا تتسع سوى ل 100 طالب على اقصى تقدير والمراجع اللي فيها اشي بخنق كلها حديثة وكثيرة صرنا نضطر نخلي اخوتنا اللي بيدرسوا باليرموك يجيبولنا مراجع واللي ما اله حد باليرموك اله الله
ليش ما تكون فيلة العميد اللي ما خده نص الجامعة مكتبة متلا
بالنسبة للمسرح من المعروف انه رسوم جامعتنا مرتفعة فمثلا اللي ساعته ب35 بيدفع للمادة 105 دنانير عشان يوخد محاضرة بالمسرح مرة بيكون في احتفال ومرة في ندوة ومرة ومرة ومرة ....
ليش بدفع مصاري انا عشان ادرس ولا عشان يقول الدكتور اليوم وبعد بكره ما في محاضرة في احتفال بالمسرح زاخر الفصل بيلاقي الدكتور حاله متأخر بالمادة بيصير يعطيها بسرعة بسرعة
اذا عارفين انه بالجامعة ما في مكان لطلبة جدد ليش بتستقبلوا طلبة هذا طبعا غير الغرف الجاهزة اللي بنسميها بركسات والمطر اللي بيكون فيها بالشتا وغير المشاغل الهندسية اللي بتوخذ فيها محاضرات......
بالنسبة للعيادة فهي في أغلب الأوقات مسكرة وللتأكد رحت بيوم من الايام 4 مرات في اوقات مختلفة مرة وحدة كانت مفتوحة موتوا وطيبوا الكوا الله
بالنسبة للإنترنت الذي نجد فيه حاليا المكان الامثل لحرية التعبير عن الرأي الصراحة في عندنا قاعات حواسيب بس دايما فيها محاضرات وما بتقدر تدخل واذا دخلت وما كان في محاضرة بتلاقي اجهزة قديمة عفى عنها الزمن بمواصفات تاريخية وبسرعة انترنت بطيئة جدا ومرات بيكون فاصل النت حتى انه بمحاضرات الحاسوب تبعتنا الدكتور اللي بيشرح بيكون يتخوت على الاجهزة ويضحك وكأنه احنا من عالم اخر ممنوع علينا نواكب الحضارة ونستخدم النت ونجيب اجهزة سريعة طيب ليش؟؟!!!!
وبتضطر تروح على النت اللي بره وتدفع فلوس عشان تدور على بحوث او تسجل او ......
بالنسبة للنشاط الرياضي فهذا بالتحديد بنسمع فيه سمعة من الجامعات التانية ما في اي لعبة بتقدر تلعبها بوقت فراغك ملاعب كرة القدم ما في غير واحد والتاني ملعب ترابي على اساس للتنس يعني ؟؟؟ مش عارف بدهم ينظموا عندنا الرولان غاروس السنة الجاية متلا ؟؟؟!!!
ومكان في غرفة بركس لتنس الطاولة متر في متر وبعدين قلبوها غرفة للمحاضرات
طيب ليش ؟؟؟؟ انا مش من حقي امارس النشاط الرياضي بوقت فراغي
بالنسبة للدفع للمحاسب بأول كل فصل بتوقف الجامعة كلها على شباك واحد بيكون عليه ازمة مش طبيعية واللي عنده واسطة بدفع قبل هدا غير المحاسب البطيىء بالعد
النقطة الاخيرة التي اود التحدث عنها هي انه احنا هسة على ابواب انتهاء الامتحانات بس بدي من القارىء الكريم يشوف متى بتنزل العلامات على موقع الكلية الموقرة أكيد كالعادة كل طلاب الجامعات الاخرى بيعرفوا علاماتهم وبرتاحوا الا احنا بنضل عايشين على اعصابا لاخر شي بعد ما نكون اكلنا الرعبة بنستلمها من النت مع انه عدد طلابنا مقارنة بجامعة باليرموك قليييييل جدا ومع ذلك باليرموك بتنزل اسرع واول باول يعني العلامة اللي بمتحنوا فيها اول بتنزل مباشرة مش متلنا كل العلامات بتنزل مع بعضها بعد فترة كتير طويلة
احنا مش طالبين امتحانات اون لاين العلامة بتنزل مباشرة بس بدنا لما الدكتور يعطي العلامات للقبول والتسجيل تنزل مباشرة........
اسف على الإطالة هذا بعض ما لاحضناه في كليتنا العزيزة
واتمنى تكون ردود الفعل منطقية من الشباب والصبايا
رد مع اقتباس
رد: أنقذوا (كلية الحصن الجامعية)
.gif "SnipeR (83)")
.gif "SnipeR (62)")
.gif "SnipeR (12)")
مواقع النشر (المفضلة)