اقرأ على مسؤوليتك الخاصة

[احساس المطر]

بسم الله الرحمن الرحيم



(( تحذير : يرجى من الي بدرسو توجيهي في المنتدى وخاصة "عبدالله قسايمه " عدم قراءة هذا الموضوع حرصا على سلامتهم العقلية و النفسية
بدك تقرأ .. اقرأ على مسؤوليتك الخاصة .. روح ادرسلك كلمتين ينفعنك أشرفلك .. والي خلص توجيهي ( اقرأ يا مان.. عليك الأمان )) ...الموضوع ملطوش


بحمد الله وكرمه كنت توجيهي علمي ... ( وقد كانت الليلة التي تسبق امتحان الرياضيات ليلة لا تـــــُــــغتفر ) وبيقولولك التوجيهي حالة طوارئ و ساحة حرب .. تردّوش على هالحكي .. أصلا ً في دارنا و ع حظـــّـــي بطـــّـــل في عزايم و لا ولايم إلا ع سنة التوجيهي تبعتي ... وفي تلك الليلة البائسة الحزينة المبكسة .. أجولك اخواني الكبار ومعاهم اولادهم ( القرود اهدى منهم بشوي ) وكنت قاعد في غرفتي وفاتح الكتاب وطاير مع التفاضل وبسبح مع المعادلات المرتبطة بالزمن
وفي وحدة ثانية ناسيها ( والحمد لله ) .. الله يقطع التوجيهي وساعته .. ( عشان الله دلــّــوني مين هو الي اخترع التوجيهي بلكي رحت حرقت حريشه .. و ريــّــحتكو من التوجيهي وقرفه ) ..


عـــــــد نــــــــا <<<
انا حاقد على الرياضيات من أيام الصف الرابع وأشكر الله وأحمده انه صارت عندي عقدة اسمها رياضيات .. أمــّــا عن الفيزيا فلا تــَســَــل .. ( أطقع من الرياضيات )

قلت لأبوي : يابا هات مفاتيح المكتبة تبعتك الي فوق ...
ابوي : شو بــد ّك فيها ؟؟
رديت عليه : ولا إشي بد ّي أروح أحشــّــش .. قصدي بدّي أروح العب في أتاري السيجا مورتال كومبات ( بعدين اللعبة جاية مع امتحان الرياضيات تمام .. يعني بتشوف مصيرك وانت بتلعب ) .. يابا شو بدي أكون رايح أسوّي يعني بدي ادرس علي بكرة امتحان رياضيات توجيهي ..

ابوي : عن جد .. طب ليش ما خبرتني قبل بوقت ؟؟ خذ هي المفتاح بس أوعى اتخرّب إشي .. والا بطبشك تطبيش .. فاهم

فريد : طيب يابا بس انت ادعيلي انه مخــّــي ما يخرب .. وتظل قدراتي العقلية سليمة وما أفلــّــت

وانا طالع ع الدرج بقول في عقلي ( الساعة 8 المسا وصارلي 3 ايام بدرس ع التفاضل ولسه مش مخلصه ..
وينتى بدي ألحــّــق أدرس النيلة والغتــّــة ؟ ( الغتة : كلمة مجهولة الهوية بتظلها امي تحكيها لم أعثر لها على معنى لا في لسان العرب ولا في القاموس المحيط بس اكيد معناها سلبي ) ..

قعدت في غرفة المكتبة .. ادرس ادرس ادرس ... الحمد لله خلصت دراسة بس يا أخي بس خلصت دراسة الوحدة الأخيرة التي فتكت بمئات الآلاف من الطلاب ( المعدلات المرتبطة بالزمن ) حسيت حالي انسيت كل إشي له علاقة بالوحدتين الي قبل .. قلت يللا ربك بفرجها .. اتطلـّـعت ع الساعة لقيتها 2 بعد نص الليل ... زبــّـطـت المنبه عشان اصحى الساعة 9 وكان الامتحان يبلــّــش ع ال11 .. ثم طجــّيت ع الفرشة ونمت بعدما انهارت قواي ..


اصحيت الصبح .. أفطرت .. وشــخــّصت .. ما شاء الله ولا ابو فايع .. مش عارف اني رايح ع الطامة الكبرى ..

وصلت مدرسة الرصيفة الثانوية وحاسس الدنيا متغيرة و في اشي غريب والمدرسة فيها أكمن شرطي انا بس شفت الشرطة خف عقلي .. ( قصدي اتطــمــّنـت ) دخلت الحرم المدرسي حوالي الساعة 10:20 ص .. قعدت انا واولاد صفي وهم قعدو يتناقشو وانا ساكت لا من ثمي ولا من كمي ( يقطع عمر التوجيهي شو بذل ّ ) ..
والا نطلك واحد من جماعتنا اسمه لطفي بيقول اسمعو يا شباب مجنون يحكي وعاقل يسمع ... قلنا له شو يا لطفي .. هات ما عندك ...
لطفي : امبارح الساعة الساعة 12 بالليل وانا قاعد بدرس والا جرس البيت قاعد برن .. قلت لحالي مين قليل الحيا الي جاي في هاي الساعة ... بكفيش توجيهي .. طالعلي انت كمان!!! ... انزلت اشوف مين والا هو واحد ملثـّــم ولابس اسود بأسود ومعاه سيجارة مارلبورو قلي تسحب سحبة؟ ..
قلتله هسه بالله عليك جاييني الساعة 12 في نص الليل عشان تعطيني سحبة دخان اقولك هاتلك سحبة ..
بس مين حضرتك ؟؟
رد عليّ الرجل الملثم : انا فلان الفلاني جايب معاي نسخة من امتحان الرياضيات تبع بكرة ..
قلتله : بالله عليك !!!! .. إيدي بزنارك أبوس رقبتك .. اعطيني اياها .. صارلي 4 ايام بدرس ومش فاهم اشي
تحب الله ... بشرف الشريف بعيلتك تعطيني اياها ..
قال لي : كل شي بحسابه ...
قلتله .. بقديش تؤمرني ؟ .. قال لي : 500 دينار و 35 قرش
قلت له : طيب 500 دينار وفهمنا و ال 35 قرش لليش ؟؟؟
وإذ بأحد المراقبين يقاطع لطفي قائلا .. يللا ع قاعاتكو...
( طبعا ً احنا عارفين انه بمزح بس عشان كنا خاف عقلنا .. ساق حبيب قلبي لطفي هذه الحكاية لإضحاكنا و التخفيف عن نفسه وعن انفسنا )

قعدت الطلاب تفوت ع القاعات ((( كأنهم يساقون الى الموت وهم ينظرون ))) ... دخلت انا وعلي نسنوسة ..( ونسنوسة هاظ اسم الحركة في شلتنا وان شاء الله رايح ييجي علي نسنوسة في قصص ثانية .. انا واياه اصحاب الروح بالروح وهو نابلسي واولاد خالتي نابلسية ( يللا فيع يا عبادة ) ..

فريد : الله يلطف فينا يا نسنوسة .. حاسس حالي فاصل شحن .. وقلبي بطبل عالقفص الصدري بدو يطلع يشم شوية هوى .. وهيها سحلية قاعدة بتكزدر قدام أهلي ..والسيارة هيها بتستنا ستيف اوستن ع باب المدرسة ...

علي ( نسنوسة ) : ولك شو مالك يا فريد ؟؟ .. شو شكلك محشش !! ..

فريد : ولك انو حشيش ؟؟ انا شكلي شكل حشيش ؟... انا بشرب بس ( بشرب مية مش تفكرو اشي ثاني لا قدر الله )
ولك يا علي هو في حشيش والا نيلة منيلة ب 60نيلة بتطلع براس مع الورق الي كنا ندرسه ؟!!!!!!

علي : هي الشورمة بقديش هاليومين ؟ .. وليش حاسس الارض بتمشي تحتي ؟ .. ولك هيني شايف بس بلحق ورا كلب ...... قاطعته قائلا : ولك انا الي محشش والا انت ؟
يللا افعط .. ورحنا كل واحد ع قاعته ...


دخلت القاعة وقعدت أحكي (( سلام عليكم دار قوم مؤمنين ... انتم السابقون ونحن اللاحقون )) .. والا المراقب بيقول لي يللا ع درجك يا شب .. قعدت أدور ع الدرج الي عليه صورتي ورقم الجلوس ... حتى ( من اللخمة ) صرت ادوّر في الدروج الي قاعدة فيها طلاب ... عاد والله كنت عارف وين هو الدرج ..
فريد : استاذ ...
الاستاذ : نعم ..
فريد : نعم الله عليك ... الدرج انسرق ..
الاستاذ : انسرق!! ... مين الي بدو يسرقه ؟؟
فريد : وانا شو بعرفني ؟
الاستاذ : طب انتا شو اسمك ؟
رديت عليه : اسمي ؟ ...
الاستاذ : لعاد اسمي ؟
قلت له : وليد ... قصدي وحيد .. لا لا .. فريد خلص فريد جواب نهائي ...
قال لي : هيــّــك هون اول درج قبال اللوح ..
قلت بعقلي ( اخلع ... قبال اللوح ... وانا بخف عقلي من القعدة قبال اللوح بعرفش ليش )

المهم ... قعدت .. و أجا مشرف القاعات ومعاه اوراق الامتحان و فتحهن قدامنا ... ( اتذكرت قصة لطفي وصرت اضحك .. وكنت عارف انو هاي أخر ضحكة رح اضحكها من هون عابين ما تطلع النتائج ... )

مسكت الدرج وكنت بدي أخلع ( أشرد ) ... واتذكرت القصص الي كان يحكيلنا اياهن استاذ الرياضيات عن الي كان يصير في الامتحانات .. ( مرة طالب بعد ما مسك ورقة الامتحان صار يسرّخ ( ولكم مش شايف اشي .. الورقة سودا .. شايف كل اشي إلا الورقة .. كلها أسود بأسود .. وبعدين غيــّب ..))

(( القصة الثانية : واحد من الطلاب أوّل ما لقف ورقة الأسئلة اتطلع فيها شوي .. بعدين مسكها هي ودفتر الإجابة و ظله فاكح ولحقوه المراقبين برة المدرسة وما وصلوه الا وهو مولع دفتر الاجابة وقاعد بضحك بشكل هستيري وهو ينظر الى الدفتر وهو مكربج ))

عــــدنــــا <<< قلت في عقلي ( ممكن يكون مصيري زي هذولاك الطلاب الأسطوريين ؟!!!) ... ما شاء الله .. كيف الهمة ؟ ... عالية ...

أعطاني ورقة الاسئلة قلت احسن اشي بعمله اكتب اسمي قبل ما انساه زي قبل شوي .. لا حول ولا قوة الا بالله ..
اول ما بلشت بلشت بالضع دائرة .. ( ولك هذول الاسئلة من وين بجيبوهن ؟؟؟ .. أي والله لو انهم يهود الي بحطو الأسئلة ما هو هيك ) .. والأحلى من هيك انه المراقب واقف فوق راسي .. وبتطلع عليي كيف بحل .. و مفكرني بدي أغش .. صحيح انا مشكلجي بس والله العظيم أكره ما علي الغش .. كل الي غشيته في حياتي مرتين .. مرة وانا في الصف الثاني كان علينا تسميع سورة الماعون وكنت مش حافظها .. مسكت (( جزء عم ّ)) وحطيته جوّات الدرج .. وصرت أقرأ .. والمس مكيفة علي .. أكثر واحد حافظ ..

والمرة الثانية في الاول ثانوي في امتحان الأحياء وبالغلط .. اسمعت جواب سؤال كنت حافظه زي اسمي .. (وانا قاعد بدرس في المادة قلت هاظ السؤال شكله رح ييجي في الامتحان ورح انسى الاجابة .. وحدث ما توقعت ..)
بس كنت بدي اروح اقول للأستاذ هيك هيك القصة .. بعدين بطلت ..

عـــــــد نــــــــا <<<


بتطلــّـَـع ع الاستاذ بحكي بيني وبين حالي ( هسه هاظ مش جاي يوقف الا فوق راس أهلي ؟؟!!!! )
فريد : أستاذ ... لو سمحت ممكن تبعد شوي عشان أعرف أحل .. بكفيش مقعدني قبال اللوح ؟

الاستاذ : نعم يا حبيبي ... انا واقف في ملك الحكومة .. بعدين انت شكلك مشكلجي وبدك اياني ابعد عشان تعرف تغش ( لا بأحلامك .. ولا بأوهامك ) ..

فريد : يا حويوي .. شو هالوقعة الي وقعناها .. طيب يا حبيبي ظلك واقف الله يخليك لإمك ..

الاستاذ : شو حكيت ؟

فريد : ولا إشي ... بحكي ما أخف دمك ..
قلي طب يللا حل .. حل أحسن لك ..

حطيت راسي في ورقة الأجوبة .. حل حل .. الحمد لله خلصت الضع دائرة .. اطلعت ع الساعة والا هي 12 ...
يعني صارلي ساعة بحل في الضع الدائرة ومش متأكد ولا من وحدة ( يا ذكر الله ) .. وظايل علي يا 5 أسئلة يا 6 مش ذاكر وكل سؤال يتراوح ما بين 3 الى 4 فروع ..

بصراحة عينيّ دمـّّــعن وصرت بدي أعيط .. يا عمي ليش الحكي .. عيّــطت ..
قعدت أناور بالأسئلة .. حل حل .. وسبــّــح واستغفر يا فريد.. سبــّــح واستغفر يللا تا حليت نص الامتحان .. خلص الامتحان .. واطلعنا من القاعة ..
واحنا طالعين كان نسنوسة بستنى فيي تحت ( احنا ساكنين في حارة وحدة واحنا اصحاب منذ الطفولة )
بتطلــّع عليه والا عينيه حمر .. بقول له آآآآآآآآ يا نسنوسة .. بشــّــر ...
نسنوسة : إيش أقشر ؟ ( شكله العصب السمعي تبعه ضرب مع الامتحان )
بقول له شو يا نسنوسة ليش عينيك حمر ؟

علي (نسنوسة ) : انا الي عينيي حمر .. طيب روح شوف حالتك ع المراية ..

فريد : والله يا نسنوسة تبهوقنا .. فش كلام .. صرت أعيط في الامتحان ..
علي نسنوسة : وانا كمان صرت أعيط ..

واحنا في طريق العودة .. بيقول لي نسنوسة بدي أقترح عليك اقتراح ..

فريد : هات اقتراحك .. انت عليك اقتراحات ( تـــgـــنــّــن)
يعني أفكارك التي لا تجيئ إلا بخير ... ولك آراء سديدة في مواقف عديدة .. تفضل يا نسنوسة ...
نسنوسة : شو رأيك نزت حالنا من فوق جسر الجبل الشمالي ؟

فريد : بالله عليك .. شو شكلك ناوي تجيبلنا الحلقة الأخيرة ؟



علي : بلاش ... طب شو رأيك انطبق المثل الشعبي الي بيقول (اشرب عرق وانسى الي مرق)

انا خرطت مشطي الشغلة ... وكانت كابسة معاي .. انا عمري ما عملتها بس هاي من فوائد التوجيهي ( من فوائد التوجيهي : جلطة دماغية .. اضطراب عقلي .. انحراف كلي أو جزئي في المعايير الأخلاقية ( زي ما كان رح يصير معاي انا ونسنوسة) .. سكتة قلبية .. احولال في حدقة العين اليسرى .. وغير ذلك الكثير الكثير من الفوائد )) بس لا يا عمي انا مش بتاع الكلام ده ...

فريد : يا نسنوسة خلي أملك بالله كبير .. بعــوّض الله ..


يوم النتائج

وهظاك الحكي كوم ويوم النتائج كوم ثاني ... رحت عالمدرسة عشان اعرف النتيجة ... حالي حال كل الطلاب ..
وصلت مطرح ما هم معلقين ورقة العلامات .. بس كانت عجقة ..أمة سيدنا محمد _ صلى الله عليه وسلم_ كلها هون ... بتطلع ع شمالي لقيت نسنوسة قاعد بردح ...
علي ( نسنوسة ) : تعال ..... ( رحت عليه بيقول لي .. يللا فيع هيني انا واياك حملنا الرياضيات .. قلتله : ايش جبت من عندك ؟!! مني عارف من قبل ما اخلص الامتحان ..
المهم .. شو صار في الفيزيا ؟؟ ...
علي : الحمد لله .. انجحنا انت جبت 55/110 ... وانا 57/110 ... سجدنا سجود شكر لله تعالى انـــّــا خلصنا من الفيزيا وقرف الفيزيا واستاذ الفيزيا ...

واحنا في الساحة بيقول لي صاحبي اسمه أنس ...
آآآآآآآآآآ يا فريد قديش جبت في الرياضيات ؟

فريد : صلي ع النبي .. أنس : (اللهم صلي وسلم على سيدنا محمد)
فريد : جبت 21/100 ( ما شاء الله نيرد ونيرد هاي كلمة متداولة في الجامعة وتعني : الانسان الذي يحطم الارقام القياسية في العلامات)

أنس : ولك لو اني حليت الضع دائرة لحالها بجيب اكثر (عاد الضع دائرة عليها 20 علامة بس هو قاعد بتخوث )

فريد : ما شاء الله عليك .. طيب انت قديش جايب ؟

أنس : وحــّــد ربك ..

فريد : لا إله إلا الله ... قديش يعني ؟

أنس : ولك بقول لك وحــّــد ربك .... يعني واحد..
فريد : ومكيفلي ع حالك .. ومش عاجباتك الواحد وعشرين آآآآآآآ يا عرص ؟ ...
أجا شرد .. لحقته وشمطته شلوط ولحــّــقته بكف (عن مزح) .. بعدين ارجعنا وسلمنا ع بعض ..

لكن .. أبشركم .. قدمت الرياضيات المستويين 3 و 4 في الفصل الثاني علما اني قدمت المستوى الرابع قبل الثالث بيوم .. والحمد لله جبت في الرياضيات م3( 58/100 )
و م4 (50/100)
ملاحظة : حلفت يمين ما افتح وحدة المعدلات المرتبطة بالزمن وكان هذا هو سر نجاحي في ال م3
( احمدو الله واشكروه يللي انجحتو في التوجيهي
واللي لسه .. ربنا يوفقهم .. شدولنا حيلكم )

((( وآخر دعواهم ان الحمد لله رب العالمين )))

[عُبادة]

الحمد لله الله ريحنا من هذيك الايااااااااااااام

[saousana]

[Ammar Qasaimeh]

شو هاذ روعه

[Sc®ipt]

[ابو عوده]

الله يلعن ايام التوجيهي ما اعطلها

[Ahmad zo3bi]

المعدلات المرتبطة بالزمن هو درس من وحدة التفاضل وبالفعل هو ازنخخخخخخخ درس .. مش وحدة كاملة...بس شو مواد التوجيهي بالنسبة لمواد الجامعة ولا شي ...صفر عالشمال

شكراااا ....تعبير رائع عن مدى المعاناة حسيت انه الكلام طالع من القلب وبعبر عن كل شي

[احساس المطر]

شكرا على ردودكم ..بالفعل تنذكر ولا تنعاد ..الجامعه اد ما كانت بننجح مو مهمه كتير العلامه لكن التوجيهي رعب وتحديد مصير

[Abdallah Qasaimeh]

والله رهيب

بس شو مالكو على المعدلات المرتبطة بالزمن...كان احلى درس عندي درست اكثر من 4 دوسيات على هالدرس لحاله
وآخر اشي اجا سؤال بنحل لحاله

عموما الريضايات هو الإشي الوحيد الحلو بالتوجيهي

[محمد العزام]