السلام عليكم ورحمة الله وبركاته

إن شاءالله يكون الجميع بخير وصحة وعافية

طبعا المكتوب مبين من عنوانه

بإذن الله سنبدأ حملة طبعا إنت المستفيد أولا وأخيرا

وبعرف إنه الكل مشغول سواء شباب أو بنات وماعنا وقت حتى لأنفسنا بس ياجماعة الرسول صلى الله عليه وسلم قال:"من ترك شيئا لله عوضه الله خيرا منه" يعني مانمسك بعادات ماتفيدنا دنيا ولا آخرة

يعني عشان يصير بركة في أوقاتنا ونجعل يومنا يكفي لكل اللي بدنا نعمله ويضل منه كمان وقت للترفيه عن أنفسنا.

ولو حسبناها مع بعض حنلاقي إنه أكتر من نص اليوم ضايع بأمور مالها معنى ويمكن كمان بتزيد بوزرنا وبتقربنا أكتر من سقر أعاذنا الله وإياكم من حرها متل

التلفونات سواء كنا نسولف مع أصحابنا ولاحبايبنا ولاحتى عالألعاب ومنضيع ساعة وساعتين وإحنا نسولف.

التي في وماأدراكم ما التي في وطبعا الأفلام والمسلسلات والمصايب اللي مابتنعد وبرضو شوفوا كم ساعة بضيع عليه؟

طريق الروحة والترويحة من الجامعة أو من الشغل أو أي مشوار

القعدة عالنت احسبو الوقت الضايع عليها

وهاد بس للتذكير لكن مش المعنى إنه هذه هي الشغلات اللي بضيع أوقاتنا بس

وأنا عملت هالمقدمة الطويلة عشان مانستكثر ساعة من وقتنا لله عز وجل وعشان كمان يوم القيامة يكون معنا إشي بسيط يخفف من هالذنوب المتلتلة ويكونلنا عين نطلب الشفاعة من رسولنا صلى الله عليه وسلم وحكينا من البداية كلنا مشغولين ماشي بس ساعة مش كتير على ربنا يعني أنا والله عندي بيتي وجوزي وطفلين وبدرس جامعة ومنتظمة بحلقة حفظ قرآن وتجويد
والي قسم صحي بمجلة البشرى الكويتية بكتب فيها وعندي شغلي ومشروعي اللي بتابعه من بلد لبلد ومع هيك في عندي وقت كمان للزيارات والتلفونات والنت والطلعات وكل هاد الحمدلله من بركة حفظ القرآن

وهلأ هاذه المقدمة كلها لنقوم بحملة حفظ سورة البقرة واللي حابب إنه ينضم لهلحملة بس يسجل اسمه تحت وحنبدأ إن شاءالله يوم الأحد القادم 20-3 وحنبدأ بإذن الله بالتسميع يعني مثلا حسب المنضمين لهلحملة يوم 20-3 إنا نبدأ بحفظ أول وجه من البقرة لآية 16 واللي بحفظ بكل أمانة وضمير بدخل بكتب الآيات اللي حفظها حتى لو شكيت إنه في خطأ ماتفتحوا المصحف يعني كأنك بتسمع قدام حدا وأنا طبعا بدخل وبخبرك إذا تسميعك منيح أو بحاجة للتثبيت أكتر وطبعا ماتخافو إحنا مش بمدرسة لكن إحنا بس منساعد بعض عالحفض والمراجعة وحنعطي عدة أيام لحفظ كم آية وبإذن الله ماحيكون في ضغط عأي حدا.

المهم اللي حابب الإنضمام للحملة بس يدخل يسجل اسمه ومش صعبة إنا نقعد 3أيا م مثلا عحفظ كم آيه وإن شاء الله بشوف تفاعل لأنه هالموضوع تجارة مع الله.

يلا ياجماعة الفكرة مو محتاجة تفكير مباشرة بس أدخل وسجل اسمك والدعوة للشباب والصبايا وياريت حتى الزوار يسجلوا بالمنتدى عشان يكون دخولنا للمنتدى في نية عبادة ولاتخلي الشيطان يقنعك إنك مشغول وماعندك وقت أو يقنعك إنه الحفظ هلأ يأثر عدراستك وبس تتخرج بصير خير أو يخليك تحكي خلص أنا بحفظ لحالي ومو محتاج أنضم لحملات واسمع لحدا انتبهوا وديروا بالكم لأنه ابليس حلف "لأقعدن لهم صراطك المستقيم" وهالقصة الكل بعرفها

والله يوفقنا لما يحبه ويرضاه.